PSG chakna Mbappe

Hun tawp dawna Kylian Mbappe goal khung hmangin Paris Saint Germain chuan an khingpui Brest 3-2 in an hneh. Paris club hian Ligue 1 match 10 aṭanga point 21 hmuin hmahruaitu Nice (22 points) hnuaiah an awm mek.

Luis Enrique naute hian Warren Zaire-Emery leh Mbappe te hmangin khung hmasa mah se, mualneitu lamin Steve Mounie leh Jeremy le Douaron te hmangin an sut - match dang ang bawkin PSG tlarhnung a phui lo.

Hun tawp dawnah erawh player ṭha bik neih hlawkna a lang - Mbappe hian a penalty beisei pek ni lo mah se, hun tawp hma deuh lawkin chakna goal a khung. PSG keeper Gianluigi Donnarumma pawhin a thawkrim ve malh malh hle.

Spanish manager Enrique naute hian season bul kha an ṭan fuh tawk lo, an match hmasa berah phei chuan khelmual pawn lam boruak vangin Mbappe an chhawr tel lo, tun hnaiah erawh insiamṭhain league match an khelh hnuhnung pangah chuan tlawm an nei lo.

PSG manager Enrique chuan, "Nice hi hmachhawn an harsa hle, a bik takin tun season chhungin anmahni khelmualaah tlawm an la nei miah lo a, chutiang laka point thum hlawh chhuah chu a hlu hle.

"Ka naute hian kawng hrang hrangin hma an sawn chho zel a, siamrem ngai lai kan siam ṭha zel bawk. Team indinthar kan nih avangin vawi leh khata danglam nghal vek theih a ni lo, kan ṭhat dan ber erawh kan la hlat hle," a ti.