Atletico an chak

Pathianni zan La Liga inkhelah Atletico Madrid-in hnehna chang turin harsatna an tawk lo a, an mikhual Alaves chu 2-1 in an hneh - Atletico tan Rodrigo Riquelme chuan minute 21-naah goal hmahruai a khung a, first half hun pek belhah Alvaro Morata chuan a belhchhah ve leh bawk.

Morata hian Riquelme khung tur hi a siamsak a ni bawk a, Spanish striker hian tun season inelna hrang hrangah match 12 khelin goal kua a khung ta a, assist vawi khat a nei bawk - a che ṭha tluang hle.

Alaves tan midfielder Ander Guevara chuan hun pek belhah goal khat khung ve leh mahse, a team kaih harh nan a tlai lutuk hret tawh a, Atletico-in an league match hnuhnung 14 an khelmuala an khelhah hnehna an la chang vek - Vicente Calderon-a an inkhelh ṭhin lai, May 2012 - February 2013 inkara an club record an lo siam tawh chu an nih rual.

Diego Simeone enkawl team hian match 10 an khelh tawh aṭangin point 25 an nei ta a, hmahruaitu Real Madrid chu match khata khel tlem chungin point thum chiahin an phak lo mek - Real bakah hian pahnihna Girona chuan point 28 an nei ve bawk a, palina Barcelona chuan match 11-ah point 24 an nei mek thung.