Haddad Maia tan WTA Elite Trophy

Pathianni zan khan WTA Elite Trophy khelh zawh a ni a, nomawi inchuhna inkhelah Beatriz Haddad Maia chuan Zheng Qinwen hnehin a chungnung ber.

World number 19 Maia-i hian hnehna chang turin darkar hnih leh minute 51 chhung a mamawh hial, inkhel inhnehtawk takah Chinese nula hi 7-6 (13-11), 7-6 (7-4) in a hneh hram a, tennis a khelh hun chhunga a tawn san ber ṭum a ni hial a ni.

Haddad Maia hian chawlhkar duhawm a hmang, nomawi chawi tur hian match pali a khelh hoah set a hloh miah lo. Group match lamah Madison Keys leh Caroline Garcia te a hneh a, chumi hnuah amah aia ranking sang world number 17 Daria Kasatkina a hneh leh bawk.

Tennis season tawpah hian a ranking sang zual pariat ten WTA Finals an khelh ṭhin, chumi khel phak lo ranking sang 11 ten WTA Elite Trophy hi an khel ve thung a ni.