Ballon d'Or chu Lionel Messi tana duan! A vawi riat nan chawimawina sang ber a dawng

Lionel Messi chuan a vawi riat nan Ballon d'Or a dawng a, football huanga mimal chawimawina sang leh ngaihhlut hlawh ber a dawn theih chhan chu Argentina tana World Cup nomawi a chawi vang a ni.

Argentina captain hnungah hian Manchester City striker ṭha Erling Haaland awmin, pathumna chu Paris Saint Germain forward Kylian Mabppe a ni thung. Mbappe pawh club aiin France tana a hnathawh a langsar.

Thawhṭanni zan khan Paris khawpuiah Ballon d'Or semna hun hi hman a ni a, Messi-a'n award a dawn meuh chuan Thawhlehni zing lam a lo ni tawh, journalist 100-te vote thlak result puan lai hi khawvel football ngainatuten an nghak ṭhup a ni.

Hmeichhe lamah Spanish nula - Barcelona tana khel Aitana Bonmati chuan a vawi khat nan Women's Ballon d'Or a dawng thung. Spanish champion a nih bakah Champions League a lakpui a, an ram chu World Cup-ah a hlawhtlinpui bawk.

World champion

Kum 2021 aṭangin Ballon d'Or dawng tur chhut hun chhung tihdanglam hret a ni a, kuminah hian Qatar World Cup 2022 kha chhiar tel a ni. Messi hian Argentina chu world champion a nihpui, an hlawhtlin theih nana player pawimawh leh an hotupa ber a ni.

Argentina tan World Cup 2022-ah khan match sarih a khelh zinga pang ngawtah 'man of the match' a ni thei, kum 2018 ang bawkin 'Golden Ball Award' hlan a ni bawk, a club PSG tana season duhthusam ni lo mah se Argentina tan erawh sawisel bo ang mai a ni thung.

Ballon d'Or dawngtu Messi chuan, "He award hi Argentina team ten kan hnathawh rah a ni, zawimuanga kan thil hlen chhuah avanga lo thleng a ni. Player, coaching staff leh Argentina mipui tana thilpek a ni," a ti.

PSG chhuahsana Inter Miami a zawm hnuah Messi a che ṭha zui a, inelna hrang hrangah match 14 aṭangin goal 11 a khung - League Cup a lakpui. Mahse, Ballon d'Or a dawn theih chhan erawh Argentina vang a ni tih a hre reng.

Vawi riatna

Mimal chawimawina a ni a, footballer-te vanglai a rei loh avangin vawi tam tak dawn a harsa. Lionel Messi hi Ballon d'Or dawng hnem record chelh mektu a ni sa a, a record hi a tihngheh belhchhah zel.

Ballon d'Or dawn hnem lama Messi hnaih bertu chu Cristiano Ronaldo a ni. Portugal captain hian vawi nga a dawng tawh a, a dawn hnuhnun ber chu kum 2017 kha a ni a, a hnu lamah a la dawng leh lo.

Kum 36 mi Messi chuan, "Hetiang tak maia football zinkawng ngaihnawm ka nei thei hi chu ka beisei phak bak a ni a, khawvel team awm tawh zinga ṭha berah ka khel thei a, chumi piah lama mimal chawimawina dawn hi a hlu.

"Copa America leh World Cup champion nih bawk chu a makin a ropui ka ti hle. Chutiang zawng zawng bakah chuan Ballon d’Or hi chu eng emaw vang tak hian a hluin a danglam a ni," a ti.

Haaland leh Mbappe

Manchester City striker Haaland-a'n season duhawm a hmang a, inelna hrang hrangah goal 52 tehmeuh khungin a club chu Premier League, Champions League leh FA Cup a lakpui - mah se World Cup leh Messi vangin a tan Ballon d'Or dawn a la rem rih lo.

Mbappe pawhin PSG tana season ṭha pangngai tak a hman bakah France chu World Cup final a hruai thleng a, nomawi inchuhna inkhelah hattrick hial siam mah se la penalty shootout-ah a vanduai zawk an ni.

Messi chuan, "Engtik niah emaw chuan Haaland leh Mbappe te hian Ballon d'Or hi an la dawng ngei ang. Erling hian a thil tihte avangin chawimawina dawn hi a phu takzet, a la dawng ngei ang tih pawh ka ring," a ti.

Award an sem hma hian Manchester City manager Pep Guardiola chuan, Ballon d'Or chu chi hnihin awm se - pakhat chu Messi tan niin a dang pakhat chu player dangin an inchuh tur ni se a tih thu fiamthu ti tak deuhin a lo sawi hial.