Chawimawina dang

Real Madrid midfielder Jude Bellingham hnenah Kopa Trophy hlan a ni, he chawimawina hi kum 21 hnuai lam player ṭha ber tana hlan ṭhin niin England international hi Borussia Dortmund leh Spanish club lian tana a chet ṭhat vanga thlan a ni.

Kum 20 mi Bellingham chuan, "Player ṭha leh ropui tak takte kiangah ka hming chhawpchhuah a ni ve a, hei ringawt pawh hi ka tan chawimawina a tling.

"A pawimawh ber erawh team hlawhtlinna a ni," a ti. England international hian Real Madrid leh Three Lions tana nomawi chawipui chu a ngaih pawimawh a nih thu a sawi a, tun season chhung ngeia tihhlawhtlin a tum bawk ang.

Kopa Trophy dawng turin Bellingham hian Bayern Munich duhlai Jamal Musiala, Barcelona rawlthar pahnih Gavi leh Pedri te bakah Real Madrid tana a khelhpui Eduardo Camavinga te a khum.

Bellingham hian World Cup awm kum a nih avangin Lionel Messi chuan Ballon d'Or dawn a phu tih a sawi a, ani ang bawk hian award dawng thei zinga mi Kylian Mbappe chuan Messi a lawmpui thu leh phu a tih thu a sawi ve bawk.

Aston Villa goalkeeper Emiliano Martinez chuan Yashin Trophy a dawng. Argentina international hian World Cup final-ah Kingsley Coman-a penalty a dang a ni satliah lo, inkhel pangngaiah hun tawp dawna Kolo Muani khung tur chu ropui takin a dansak bawk.

Argentina tana a chet ṭhat bakah hian Aston Villa chu Premier League-ah pasarihna a nihpui a, a club hi Europa Conference League khel turin a tlinpui hial bawk a ni.

Qatar World Cup champion an nih ṭum khan goalkeeper ṭha ber atan thlan a lo ni tawh bawk. An champion ṭum hian France ho ngaitheih loh tur thil a ti nual a, hei vang hian Ballon d'Or semna hunah pawh hian mipui lamin thawm an lo nei deuh hak a ni.

Manchester City chu club of the year award hlan an ni. Pep Guardiola enkawl hian EPL, UCL leh FA Cup an la fai vek. Ballon d'Or award dawng thei tur hian player pasarih ngawt an thawh.

Award ngaihhlut ber Ballon d'Or dawng ta chiah lo mah se Erling Haaland kutah goal khung hnem ber chawimawina Gerd Muller Trophy hlan a ni. Messi-a'n a sawi angin, a chesual hle a nih ngawt loh chuan Man City striker hian Ballon d'Or pawh a la hlawhchhuah ve ngei a rinawm.