Ten Hag-a hmalam hun atana inkhel pawimawh chu: zanin dar 1:45-ah Man United Vs Newcastle

Carabao Cup last 16-ah zanin dar 1:45 hian Manchester United-in Old Trafford-ah Newcastle United an mikhual dawn. Inkhel tur hi League Cup last 16 a ni ringawt lo a, season bul ṭan ṭha lo Erik Ten Hag-a hote tan fiahna a ni.

Dutch manager Ten Hag hi nikum April 21 khan Man United manager atan ruat a ni a, season khat chhung lekin League Cup nomawi a chawipui nghal bakah FA Cup-ah pahnihna an ni a, Premier League-ah pathumna ni phakin Champions League khel turin an tling bawk.

Man United ṭantuten beiseina sang tak nen season thar an thlir a, October thla a ral meuh chuan Premier League-a champion beiseina a tawp titih der tawh. A rorelna ṭhuthleng aṭanga Pep Guardiola paih thlatu tura United ṭantuten an ngaih Ten Hag-a'n tun dinhmunah a beisei a pha rih lo a, Spanish manager vangin a hna thlengin a derthawngah a ngaih theih ta zawk.

Old Trafford-ah Man United-in an hmelma Man City 3-0 ngawtin an hneh lo a, an inhumhimna kulhpui meuh pawh a him ta lo. Zanina an khingpui tur Newcastle United hi kumin April thla maia khual muala 2-0 a an hneh loh kha an ni a, nikum khan Old Trafford-ah goal awm loin an inhnehtawk bawk. Eddie Howe-a hote hi Champions League khel pha an ni a, a tawi zawng chuan Man United-in an tiatpui an tum dawn.

United leh buaina

Man City manager Pep Guardiola chuan, "Chairman, CEO, sport director, manager leh player te hmathlir a inang vek," tiin a sawi a, hei hi Sir Alex Ferguson-a awm loh hnu Manchester United-ah chuan a letling thawk thung.

Ole Gunnar Solskjaer khan Erling Haaland leh Jude Bellingham te lak a duh a, club thuneituten an remti lo, tihte chu tun hnaia rawn irh chhuak leh a ni. Chutiang bawkin David Moyes, Louis van Gaal leh Jose Mourinho te pawhin harsatna an nei vek.

Ralf Rangnick-a'n November 2021 thlaa United enkawl lailawk hna a thawk khan, United-in siam ṭhat an mamawh thu a sawi. Liverpool laka 4-0 a an tlawm zawhah Rangnick chuan, "United buaina hmu turin tarmit vuah a ngai lo. Kan buaina hi pawn langa chinfel chi a ni lo. Damdawi lam ang chuah sawifiah dawn ila, kan dinhmun hi 'lung zai' ang hial ngai a ni," ti hialin a sawi.

Mahse, United thuneituten Rangnick an pawmpui lo. Ten Hag chungah rinna an nghat a, pound maktaduai 350 chuang an sen hnuah pawh eng ruai an la ang thei lo. Result an neih ṭhat tak loah chuan transfer-a an chet dan thlirletin an chesual hret hretah a ngaih theih.

Rasmus Hojlund laka an sum sen £72m hi Atalanta-in thla 12 liam taa Strurm Graz an lakluhna let nga a tling a, Danish striker hian theihna nei sang mah se Premier League-a a ṭha tih hriat sa Harry Kane lak an tum loh phahna a ni tlat.

Chelsea-a kum khat lek contract nei tawh Mason Mount lak nan £55m an hmang a, Fiorentina aṭangin loan-in Sofyan Amrabat an lalut bawk. West Ham United chhuahsan pawi titawh lo Declan Rice lak tumin hma an la tawk lo a, Arsenal ṭantute an lawm ta thung.

Europe inelna sang ni pha lo Eredivisie lamah United an bazar a; Antony (£82m) leh Tyrell Malacia (£13m) a an sum sen te hi chu a chuang liam hretah a ngaih theih hial.

Engtin zel?

Transfer leh khelmual pawna an chet dan dah ṭha ila, khelmual chhung lamah hliam vangin an buai ve bawk. Hojlund-a'n hliam vangin season bul a ṭan thei lo a, tlarhnung lam an hliam reng a, tunah pawh Lisandro Martinez, Malacia leh Luke Shaw te inhliam vangin an la inlan thei lo ang.

Hliam vanga buaina belhchhah turin Ten Hag-a'n Jadon Sancho a thunun zo lo a, English forward hi Tlumtea thlira an thlir kha ni mah se first team zingah pawh a training tawh lo. Man City lakah 3-0 ngawta an tlawm avangin inrintawkna an hloh leh a, zanin hi insiamṭhat hun a ni ang.

Casemiro leh Aaron Wan-Bissaka ten training an nei leh tawh a, Magpies lakah bul an ṭan loh pawhin squad-a an awm theih tawh a rinawm. United ṭantuten Premier League-a goal khung harsat Hojlund-a'n Champions League anga League Cup-a a chet ṭhat an beisei dawn a, Marcus Rashford-a'n a goal khungna boot a bun tawh an beisei bawk ang.

Mahse maw, Newcastle hi an buai ve tho. Old Trafford-ah hian first team squad-a mi player paruk ngawt an inlan thei dawn lo. Pawisa thapna lama inhnamhnawih Sandro Tonali-a'n hremna a hmang ṭan tawh a, thla 10 ngawt a a khel thei dawn lo. Magpies hian forward Alexander Isak (ṭhal), midfielder Jacob Murphy (dar), winger Elliot Anderson (hnung zâng), winger Harvey Barnes (ke zungpui) leh defender Sven Botman (khup) te an inlan dawn lo.

Newcastle hi kartawp khan Wolves nen 2-2 in an inhnehtawk a, hemi hma hian UCL-ah an mualah Borussia Dortmund 1-0 in an hneh lo. Premier League-ah Magpies hi paruknaah awm mek mah se Man United aiin point hnih chauhin an sang a, Howe-a hote hian season bul an ṭan ṭha bik lo. Zanin hi club pahnih tan tun season atana bul ṭan ṭhat leh hun a ni a, tu zawk nge dingchang ang tih chu a hriat thuai dawn e.