Diaz-a pa an zawng zel

Liverpool forward Luis Diaz-a pa bo mek zawn runpui chu Colombia-ah thawh chhunzawm zel a ni a, thuneitute chuan Diaz-a pa awmna hre theite hnenah chuan £40,000 (Rs. 40,58,827) pek an intiam hial.

Pathianni khan Liverpool chuan Premier League match-ah 3-0 in Nottingham Forest an hneh a, he inkhelah hian Diaz chu bul ṭan tur zingah tel mah se a nu leh pa ruk bo an nih avangin squad aṭangin a inhnukdawk.

Colombia hmar lamah sipai leh police 120 chuangin Diaz-a pa zawn hna an thawk mek a, a nu Cilenis Marulanda erawh Inrinni khan hmuh a ni tawh. Colombia sorkar chuan kawng ṭhenkhat an dan bakah, thlawhtheihna nena thawk chhuakin Diaz-a pa hi an zawn thu an sawi.

Liverpool-in league match-a Forest an hneh zawh khan Liverpool boss Jurgen Klopp chuan, "Luis Diaz tana kan tihtheih sang ber chu hnehna chan kha a ni," a ti a, an forward Diaz an hriatreng thu a sawi.

Colombia president Gustavo Petro chuan sorkar leh police lamten Diaz chu an biak pawh reng thu a sawi a, Liverpool chuan thuchhuah siamin, "Diaz-a te chhungkaw himna hi kan ngaih pawimawh ber a ni dawn a, a rang thei ang bera he buaina hi chinfel a nih kan beisei a ni," an ti.

Klopp chuan an thu hriat dengkhawng tak avanga inkhelh a harsat thu sawi zuiin, "Ka hun tawn tawh azawnga harsa berah kan inkhelh a ṭul a, manager nihna anga match 1000 chuang enkawl tawh chuan engkim kan tawng tawh ang hialah ka inngai.

"Mahse, tun ṭum chu mahni inngaihtuah theih a ni lo a, engkim a ṭhat leh theih nan kan ṭawngṭai a ni. Kan tihtheih awmchhun chu kan unaupa tana theihtawp chhuah a ni a, chutiang tak chuan ka player-te khan an ti. An unaupa tan theihtawp an chhuah a ni," a ti.

A goal khung lawm nana Diaz jersey keng langtu Diogo Jota chuan, "Hun hrehawm tak a tawn mekah a tan kan awm tih tihlan ka duh vang a ni. Inkhelh hma khan hotel-ah kan la awm ho reng a, a kir leh a ṭul ta a ni. Inkhel tur a ni a, a aiah ka lut ta a, kan hre reng tih tihlan nan a jersey ka keng lang - engkim a ṭhat leh vek kan beisei," a ti.

Colombian Football Federation pawhin thuchhuah siamin, "He hun harsaah hian Diaz leh a chhungte kan hre reng a, buaina hi chinfel a nih thuai theih nan thuneitute chu a rang thei ang bera hma la turin kan phut a ni," an ti a, "Luis Manuel Diaz rubotute hi tunah Manuel chhuah nghal turin kan ngen a, football muanna tihbawrhban kan phal lo. Lucho, i lam kan ṭang tlat a, Colombia chuan a hre reng che a ni," an ti bawk.

Liverpool hian zanin dar 1:15-ah League Cup round of 16 match khel turin Bournemouth an lenchilh dawn a, Cherries khelmualah hnehna chan an inbeisei ang.