Jamshedpur-in Mohun Bagan mikhual dawn

Zaninah Indian Super League en tur a awm dawn a, Jamshedpur FC chuan zan dar 8:00 hian Mohun Bagan an mikhual dawn - Men of Steel (Jamshedpur sawina) khelmuala inlan tur an nih avangin chak chiang sa sawi a rem lo.

JFC hian beisei angin season an la hmang lo - league match nga an khelh tawhah vawi khat chiah an la chak ve a, vawi hnih draw result neiin, vawi hnih an tlawm.

Mizo tlangval Ricky Lallawmawma leh PC Laldinpuia te khelhna club hi an match hnuhnung bera NorthEast United nena an inkhelahte khan an vanduai hle - minute 90 thleng chu Daniel Chima Chukwu goal khung hmangin 1-0 in hma an hruai a, chak turah an inngai tawh.

Mahse, hun pek belhah goal hnih chhuahin, 2-1 in an tlawm zui a, zaninah chuan chak ngei an tum tawh dawn - mahse, an hmachhawn tur hi Lalrinliana Hnamte (Terina) khelhna Mohun Bagan an ni a, ISL-a squad chhah ber ang hiala sawi ngam an ni tlat.

Mohun Bagan hian tun season ISL-ah match thum chiah an la khel a, mahse, an chak vek miau avangin table-ah heti chung hian pathumna an la ni phak tho! Kolkata club-in match an khelh tlem fal chhan pakhat hi AFC Cup an khelh vang leh Kolkata derby-a East Bengal nena an inkhel tur sawn a nih vang a ni.

Bagan leh East Bengal hi a tirah chuan October 28 khan inkhel tura tih an ni a, mahse, an inkhelh hun hi ISL enkawltu Football Sports Development Limited (FSDL) chuan October 5 khan sawn a nih thu an puang tawh.

Kolkata derby sawn a nih chhan hi chiang taka tarlan awm rih lo mah se, hemi ni vek hian ODI Cricket World Cup 2023 match-a Netherlands leh Bangladesh an inkhelh vang nia sawi a ni a, hei hian venhimna kalpuinaah harsatna a thlen avangin khelh hun sawn a ni ta a ni.