Cricket World Cup Afghanistan-in beiseina nung an nei

ICC Cricket World Cup-ah team 10-in match ruk ṭheuh an khel tawh a, chung leng leh hnuai leng a inthliar ṭan - champion lai England phei chu an tla der tawh. Afghanistan erawhin October 30, Thawhṭanni khan Sri Lanka an hneh a, semifinal lut turin beiseina nung an nei thung.

Vawiin tlai dar 2:00 hian a sang pali zinga mi New Zealand leh South Africa te Maharashtra Cricket Association Stadium-ah an inkhel dawn a, heta chak zawk tan semifinal a hnai nghal viau bawk ang.

Dark Horse 'Afghanistan'

Kumin World Cup-a cricket khawvel barakhaihtu chu Afghanistan an ni a, Sri Lanka an hneh avangin panganaah an awm mek. MCA Stadium-ah Afghanistan-in vawm hmasak an thlang a, Sri Lanka tan Pathum Nissanka (46), Kusal Mendis (39) leh Sadeera Samarawickrama (36) te che chhe lo mah se che ṭha fal an awm lo.

Afghan bowler Fazalhaq Farooqi-a'n wicket li a la a, Lions-in over 50 pawh an tlin lo. Over 49.3-ah 241 runs siamin an thi fai vek a, an target chhawp hi a beitham hle. Afghanistan opener Rahmanullah Gurbaz-a'n run khat pawh siam loin pavillion-ah a kir a, mah se batter dang an che ṭha thung.

Azmatullah Omarzai (73) leh Hashmatullah Shahidi (58) te thi loin a tawp an thleng a, Rahmat Shah (62) leh Ibrahim Zadran (39) te pawh an che ṭha. Afghanistan hian over 45.2 lekah 242/3 runs siamin wicket saihin an chak.

Bangladesh hneh loin Afghanistan hian bul ṭan mah se tunah erawh Sri Lanka hnehtu an ni ringawt lo. Shahidi hote hian champion lai England leh Pakistan te an hneh tawh. Team nem zinga mi Netherlands an hmachhawn dawn a, an chak a nih chuan semifinal an hnaih zel ang.

Amaherawhchu semifinal lut tur chuan Afghanistan hian fiahna hautak an hmachhawn a ṭul a, tuna a sang pali zinga awm mek Australia leh South Africa te hi an la hmachhawn dawn. He inkhel pahnih hian an hmalam hun a hril ang.

India hnung zuitu tur

Table chung berah India an awm a, chhiarkawp dan chuan semifinal luh loh dan awm bawk mah se Rohit Sharma hote hi semifinal ticket an nei tawhah a ngaih theih. Men in Blue hnung zui tur team pathum an zawng dawn a, vawiina inkhel tur South Africa leh New Zealand te hi an hnuai chiaha awm te an ni.

South Africa hian mak taka Netherlands laka an tlawm tih loh chu an la chak vek. Batter pahnih Quinton de Kock leh Aiden Markram te tan tournament chhinchhiah tlak a ni a, a vawmtu lamah Kagiso Radaba leh Gerlad Coetzee te an rintlak.

New Zealand lamah Rachin Ravindra a che ṭha thlawt a; Devon Conway, Daryl Mitchell te hi run siam turin an rintlak viau bawk. Bowling lamah Trent Boult, Mitchell Santner leh Glenn Phillips te hi team chakpui thei tur khawpa ṭha an ni.

Proteas an hmachhawn hunah hian Black Caps tan captain Kane Williamson a rawn kir theih a rinaw am mahse Lockie Ferguson inhliam vangin a inlan theih a rinawm loh thung. Lockie hian Australia an hneh loh ṭumin over thum chauh a vawm a, a hliam hi dam ṭan mah se stage sang zawk khelh tur a la awm avangin New Zealand-in an risk ngam a rinawm loh.