Bayern khelh hun tur chiang lo

German Cup tia khawthlang media-te hriat lar, DFB Pokal second round chu nizan khan khelh ṭan a ni a, hetihrual hian German club zinga ngaihven hlawh fal pahnih tia chhal ngam Borussia Dortmund leh Bayern Munich erawh zaninah an inlan ve dawn chauh - Bayern hi an inlan thei lo mai thei!

Bayern hi ruahman dan chuan zanin dar 1:15 hian Saarbrücken khelmualah leng tur an ni a, mahse, German third division club innghahna Saarbrücken khawpuiah ruah a sur nasat avangin inkhel lo thei dinhmunah an ding mek.

Saarbrücken khawpuiah ruah a sur nasa a, hei hian inkhelh theih loh khawpin khelmualah ruah tui a ti tam - Saarbrucken hian an league match hnuhnung bera Dynamo Dresden nena an inkhel tura tih pawh an khel thei lo a, Bayern nena an match tur pawh a chiang lo.

Khawchin thlirna aṭanga a lan dan chuan Saarbrucken-ah hian ni sarih chhung chu ruah a la sur dawn a, hetiang a nih chuan Bundesliga lama 8-0 ngawta Darmstadt sawp hlim Bayern tan German third division club khelmualah len luh chi a ni dawn lo a ni.

Hetihrual hian match hi ruahman anga a kaltlang dawn a nih chuan Saarbrücken khelmuala khel kher lo tura ruahman a ni ve thei bawk.

Bayern hma hun a chian loh lai hian Borussia Dortmund chuan zanin dar 10:30 hian Hoffenheim an mikhual dawn a, Bundesliga club ve ve inkhel tur an nih avangin inkhel hmuhnawm a beisei ngam ang.

Tun season Bundesliga match kua an khelha tlawm la nei lo, Xabi Alonso enkawl Bayer Leverkusen pawh zanin dar 10:30-ah vek an inlan dawn a, third division club SV Sandhausen khelmualah an len dawn avangin hnehna chang tura beisei an ni.