November 16 aṭangin MPL10 Phase II

MFA Executive Committee chuan Zote Toyoto MPL10 Phase II chu November 16, Ningani aṭanga khelh ṭan leh turin ruahmanna an siam a, kum 2023 chhunga zawh hman ngei tum a ni.

September 26, Thawhlehni khan MPL10 round 7 khelh zawh a ni a, Santosh Trophy atana Mizoram team inpuahchahna avangin chawlh zui a ni. October thlaah Santosh Trophy group stage khelh a ni a, Mizoramin final round an luh avangin MFA-in inelna neih leh hun an ngaichang.

Nakkum February thlaah Santosh Trophy final round khelh a nih dawn avangin MPL10 chhunzawm a ni a, Krismas vuakvetah a hmawr bawkna neih a rinawm. Match sarih khelh zawh tawhah Chanmari FC chu hmahruaitu an ni mek a, semifinal khel tur a la chiang lo - tualchhung football hmuhnawm thlir tur a awm leh dawn.

Inelna buatsaihtu MPL Board lam tan pawh ruahmanna siam a har dawn. Aizawl FC-in I League an khelh avangin fixtures siam ringawt pawh hi hna hautak a ni ang. Tun dinhmunah inelna ṭan hun chauh puan a ni a, fixtures tihchhuah a la ni lo.