World Cup 2034 - Saudi Arabia-in a thleng dawn!

"Khawvela ennawm ropui ber," tih hiala a hming lem an pek World Cup 2034 chu thlen diltu pakhat chauh an awm a, diltu awmchhun hi Saudi Arabia an nih avangin Cristiano Ronaldo inkhelhna ram hian World Cup 2034 chu an thleng ngei dawn niin a lang.

Football khawvela thuneitu sang ber FIFA chuan World Cup 2034 thlen dil theihna a hawn khan, Asia khawmualpui emaw Oceania huam chhunga ramte tan a dil theih thu an sawi a, Saudi hian an dil tur thu tichiang nghalin, Australia hming a ri bawk.

Mahse, Thawhlehni zan khan World Cup thlen dil theih hun chhung hi a tawp a, Football Australia chuan dilna an theh lut ve ta lo - Women's Asian Cup 2026 leh Club World Cup 2029 an thleng dawn a, hemi lama insawrbing law law hi Australia chuan a thlang ta a ni.

A chian hun tur

Saudi chiahin an dil miau avangin World Cup 2034 hi an thleng dawn, tia sawi ngam a ni a, chutihrual chuan paltlang tur tam tak a la awm avangin 100% a thleng ngei tura sawi erawh thil theih a la ni lo thung - kum 2024 kum tawp lamah a chiang ang.

FIFA chuan dilnate hi an zirchian leh phawt tur thu an sawi a, World Cup thlen diltute nen inbiaknate pawh neih leh phawt a ni dawn a ni - heng inbiaknaah hian hmun hma an neih dan, sumdawnna lam thil leh human rights chungchang thlengin sawi lan a ni dawn a ni.

Saudi Arabian Football Federation president Yasser Al Misehal chuan, "Kan ramin football-a âtchilhzia rilrua hre reng chungin, Saudi Arabian Football Federation chu World Cup thleng tura zawm ngai leh tihngai zawng zawng titurin a inpeih a ni," a ti - hetihrual hian mihring zalenna rah beh lama an hmingchhiat êm avangin pawl tam tak chuan an sawisel nghal.

World Cup chu

Nikum khan Qatar chuan sawiselna tam tak karah World Cup 2022 a thleng a, khelh leh hun tur hi World Cup 2026 niin, USA, Mexico leh Canada ten an inthlen ṭawm dawn - World Cup 2030 thleng chu Spain, Portugal leh Morocco ten an inthlen ṭawm dawn thung.

World Cup 2030-a match hmasa pathum chu Uruguay, Argentina leh Paraguay-ah khelh a ni dawn thung a, hei hi World Cup kum 100 tlin lawmna atana tih a ni. World Cup hmasa ber hi kum 1930 khan Uruguay-ah khelh a ni.

Mahse, hei pawh hi nakkuma neih tur FIFA Congress-in a pawm ve leh phawt a ngai dawn a, harsatna erawh a awm lo tura ngaih a ni - a tawi zawnga sawi chuan World Cup 2034 thlengin a khelhna tur a chiang tawh a, khawvelin ennawm ropui en tur a nei zel dawn e.