February thlaah Santosh Trophy final round

Hero Senior NFC for Santosh Trophy 2023 group stage chu October thla khan India ram hmun hrang hrangah khelh a ni a, final round khel tur team 12 a chiang tawh. Ruahmanna hmasaah chuan November thla hian Arunachal Pradesh-ah final round hi khelh tur a ni a, amaherawhchu February 2024-ah sawn a ni.

Santosh Trophy final round-ah hian FIFA president Gianni Infantino sawm a ni a, football thuneitu sang ber FIFA President hman hun an ngaihchan avangin inelna neih hun hi an sawn. Inelna neihna hmun tur erawh Arunachal Pradesh a la ni tho ang.

Mizoram team hian Amritsar, Punjab-ah inelna hmachhawnin coach Lalsangzuala Hmar leh manager K. Lalenghluna te hoin final round khel turin an inpettling a, October 29, Pathianni khan Aizawl an rawn thleng. Santosh Trophy 2014 champion Mizoram hian tun hnaiah final round thlen an harsat a, National Games hnuhnung pahnihah Mizoram mipa football team an tel pha lo.

Hemi a nih avang hian Mizoram tan tun ṭuma final round an thleng hi chanchin lawmawm a ni a, kum nga hnuah final round hi an khel leh dawn chiah. Final round-ah hian inelna thlengtu Arunachal Pradesh bakah nikum finalist Karnataka leh Meghalaya bakah qualifying round aṭangin team kua an inpettling. Team kuate chu Goa, Delhi, Manipur, Assam, Maharashtra, Services, Kerala, Railways leh Mizoram te an ni.