Puitea & Isak ten goal an khung

Indian Super League-ah Thawhlehni zan khan Odisha FC Chuan 3-2 in Bengaluru FC an hneh a, he inkhelah hian Mizo footballer K. Lalṭhathanga (Puitea) leh Isak Vanlalruatfela ten goal khat ve ve an khung.

Bengaluru hian Sunil Chhetri leh Ryan Williams goal hmangin 2-0 in hma an hruai hman a, mahse, Odisha tan Puitea leh Isak-a bakah Amey Ranawade chuan goal khat khungin, 3-2 in an chak daih!

Bengaluru lamah hian Naorem Roshan Singh chu a yellow card pahnihna avangin hnawhchhuah a ni a, hetihlai hian game dinhmun chu 2-2 niin, Bengaluru-in kim loa khelh an tuar, tiin a sawi theih.

A tirah Bengaluru

Odisha khelmualah Bengaluru-in inkhel an thunun a, Sunil Chhetri vanneih ṭum ni se India captain hian goal khat aia tam a khung hial ang - minute riatnaah an dang reng thei lo a, goal hmahruai a khung.

Mualneitu Odisha an insiamrem hman lo. Minute 10 a liam a, an tlarhnung pherh tak karah Ryan Williams chuan a khung belh leh - minute 20 pawh a tlin em hmain goal hnih a lut a, Odisha lama lut ve ve a ni.

Mikhual team-in harsatna nei loin goal hnih an khung a, mahni mualah Odisha an hawihai - Bengaluru hmaa match li an khelha vawi khat chiah chak Odisha player-te an thlaphang a, an hrilh a hai.

Beiseina siamtu

Odisha buai vanglai takin Mizo player an lo lang a, player hmuhnawm bik K. Lalṭhathanga'n minute 23-naah goal chung kil sirah mawi zetin a thlawh lut a, a ban phar chunga beidawng lo tura a ṭhiante fuih chungin a goal khung a lawm.

Odisha an phur sawt. Minute 45-naah khel ṭha êm êm mai Isak-a hun a her chhuak a, Mizo forward ṭha mi hian Bengaluru tlarhnung buai nuai karah an goal hnihna a khung - Isak-a hi AFC Cup-a goal khung hlim a ni.

Minute 52-naah Bengaluru defender Roshan Singh chuan Puitea laka a foul avangin a yellow card pahnihna a hmu a, Bengaluru pakhatin an tlem. Mualneitu tan Ranawade chuan a khung zui leh a, 3-2 in Odisha an 'comeback'.

Puitea thawhlehna!

ISL-ah Puitea'n NorthEast United, Kerala Blasters, Mohun Bagan leh Odisha tan a khel ta a, Blasters-a a khelh laiin ISL final hial hruai thleng mah se, season hmasa tawp lamah khan a beisei angin khelhna hmun a chang tam lo - December 2022 khan Mohun Bagan a zawm.

Puitea hian Bagan tan match 10 khelin ISL nomawi chawi mah se Blasters-a a 'form' a phak lo a, tun season-ah Odisha panin, match nga an khelh tawhah a la inlan vek. Puitea chuan, "Coach thar ṭha tak hnuaiah ka khel a, ani hian inrintawkna min pe nasa.

"Ka khelhpuite, a bik takin Mizo player-te avangin ka tlangnel nghal a, insiamrem turin hun ka mamawh rei lo phah," a ti a, a zawna a vawi thum nana ISL final khelh a châk thu Vanglaini a hrilh bawk.

Isak & goal

AFC Cup-ah Isak-a'n goal a khung a, league match-ah Kerala Blasters ngam lo zui mah se Bengaluru lakah goal a khung ve leh ta - tun season ISL-ah a goal khung hmasak ber a ni.

Aizawl FC forward hlui chuan, "Goal khung hi chu engtiklai pawhin ka châk reng a, mahse, a theih bik tlat lo. Zanin kha chu ka vannei khawp mai - mihring tak pawhin goal khung hi ka duh êm êm reng a, Pathianin ka ṭawngṭaina a lo ngaithla ṭhin hi mak ka ti a, a zarah goal ka khung a ni," tiin Vanglaini a hrilh.

Isak-a chuan sawi zawmin, "Keimah bikah chuan tun season-ah goal nga tal khung ka duh a, a theih dawn em tih erawh ka hre bik lo a, theihtawp erawh ka chhuah dawn," a ti - Odisha tan hian Jerry Lalrinzuala leh Jerry Mawihmingthanga ten inkhel bul an ṭan bawk.