Mi 45 ten Ballon d'Or an dawng tawh

Football huanga mimal chawimawina sang ber Ballon d'Or hi kum 1956 aṭang khan sem ṭan a ni a, kum 2020 khan khawvel pumah hripui Covid-19 a len nasat avangin sem a ni lo, kum dangah chuan tluang taka sem ṭhin a ni.

Ballon d'Or hi vawi 67 sem chhuah tawh niin, he chawimawina dawng thei zat chu player 45 an ni. An zinga player 10 chauhin vawi khat aia tam an dawng thei a, a dang zawngin vawi khat ṭheuh an dawng.

Lionel Messi chuan vawi riat dawng tawhin a dawng tam fal hle, amah hnaih bertu Cristiano Ronaldo chuan vawi nga a dawng tawh thung. Player ropui pahnih hnungah hian vawi thum dawng tawh - Michel Platini, Johan Cruyff leh Marco van Basten te an awm.

Award hi France rama football chanchinbu pakhat, kar tin chhuak France Football sem niin kum 2010 leh 2015 inkar khan FIFA nen inremna siamin FIFA Ballon d'Or tih a ni a, mahse an thawhhona hi kum 2016 khan an ti tawp zui leh ta zawk.

Tun hma chuan season hmasa lama an chet dan chu award dawng tur teh nan hman a ni ṭhin a, kum 2021 aṭang khan award dawng tur thlanna hi season ni loin kum bia an chet dan chhiar a ni.

Kum dangah chuan World Cup hi club lamin nipui chawlh an hman laia khelh a ni ṭhin, nikum erawh kha chuan Qatar ram a lum em avangin a vawi khat nan thlasik laiin an khel a, award dawng tur tehnaah hian Qatar World Cup a tel.

Player ropui leh sulhnu ṭha tam tak an chhuak tawh a, chung zingah chuan Bobby Charlton, Franz Beckenbauer, Gerd Muller, Paolo Rossi, Zinedine Zidane, Rivaldo, Ronaldinho, Kaka leh Messi te hi FIFA World Cup, European Cup/UEFA Champions League leh Ballon d'Or kawl kawp vek thei an ni.