Match hmasa berah Alcaraz chak lo

Carlos Alcaraz chuan beiseina sang tak nen Paris Masters khel mah se, a match hmasa berah Roman Safiullin hneh loin a zinkawng a tawp - a tlak nghal avangin atan world number 1 ni chunga season khar a harsa tawh dawn.

Thawhlehni zan inkhelah world number 2 Alcaraz hian world number 45 Safiullin hi 6-3, 6-4 in a hneh lo. Russian tlangval Safiullin a khel ṭha em em a, a tir aṭanga a tawp thlengin inkhel a thunun hneh hle.

Kum 26 mi Safiullin chuan, "Carlos kha a khelh ṭhat ber ṭum a ni dawn lo a, kei erawh ka chet ṭhat ni a ni hlauh thung. Rilru leh taksa a hah a, engkim mai kha inbeihna a ni, a tir aṭanga inkhel ka thunun thei kha a pawimawh lai chu a ni," a ti.

Inkhel dangah Novak Djokovic erawhin harsatna a tawk lo. Serbian star hian US Open nomawi a chawi hnua a vawi khat nan mimal tournament a khel a, a match hmasa berah Miomir Kecmanovic chu 6-4, 6-2 in a hneh.