Silly Point : Sahmulphah thla 'Festival'

ICC World Cup 2023 League Stage round 9 inkhel awm turah round 6-na an zo fel a, round 7-na bul kan han ṭan leh ta. Team tin thlen chin tur riruang a lang tan ta uarh mai.

Champion lai England chu pawnthuah tel hmasa tur team zingah an ngaih theih tawh a, Bangladesh an tla chiang tawh bawk. He thu buatsaih lai hian nizan lam South Africa leh New Zealand inkhel chanchin kimchang kan hre hman ta lo a, a chak zawk tan semifinal a hnai uar ang.

Knockout tenau

Tun World Cup-a 'Dark Horse' Afghanistan team-in semifinal luh an beisei a nih chuan, naktuk Zirtawp zanah hian Netherlands an hneh ngei ngei a ngai dawn.

Chutihrual chuan, an khingpui tur hi mi rin phak baka che ṭha Netherlands an ni. World Cup ṭan hmain point box turin khawvelin Netherlands hi a ring a, mahse Test cricket pawh khel pha lo ram hian South Africa leh Bangladesh an hneh thei tlat. Team pahnih tan hian knockout round a ni ber tawh ang.

India-Lanka

Hindu Epic Ramayana-ah chuan, vawiin thlenga India rama kan festival lar Diwali lo awmna chhan chu, Lord Raman lu sawm nei Lanka Lal Sual Ravanan, a nupui Sita a ruksak, chhuhlet lehna leh amah Sual Ravana ngei a thahna champha hriat rengna vang tih inziak a inziak.

Kuminah hian November 12 hi Diwali ni a ni a; zanin hian India-in cricket Mecca Wankhede Stadium, Mumbai-a hnehna an chan chuan advance diwali a ni dawn tih a chiang. Halmawi leh puakthei chi tinreng kan hmu leh ngei ang.

Tun ṭum inkhel tur hi 2011 World Cup Final carbon copy replay a tih theih a, a inkhelte leh inkhelhna hmun a ngai tlat. India team hi khami kuma mi ai khan an ṭha zawk mah a tih theih a, Sri Lanka team erawh kha kum 12 liam ta team ai kha chuan an ruh a no deuh tih huai takin a sawi ngam awm e.

Team Bharat

Semifinal lut chiang tawh angin Rohit Sharma leh a hote hi a sawi theih. Pathianni lamah South Africa nen inkhel pawimawh an la hmachhawn dawn avangin, KL Rahul chawlh hahdam tira, wicket keeper tura Ishan Kishan an luhtir pawn thil atthlak lo tak a ni ngei ang. Tin, senior batsman Virat Kohli emaw, amah Rohit Sharma ngei pawh chawlh hahdam tir a pawi lem lo ang.

Bangladesh nena an inkhelh ṭuma ball a rah sual avanga kerek ti na Hardik Pandya erawh match fitness mamawh a nih avangin a dam hman chuan a khel ang. India tan vice captain Hardik hi khelmual chhunga a rawn luh thuai hi team tan a pawimawh a ni.

Ravindran Ashwin hian Jadeja emaw, Kuldeep Yadav a te thaw lakna hun a siamsak hun tak a ni bawk ang. Chutiang bawkin tun World Cup a, a role la chiang lo Shardul Thakur-a'n Bumrah emaw Mohammed Siraj te chutri pek lawk a sual lo bawk ang.

Run Ruaipui

Wankhede khelmual zau lem lo tak hi batsman-te tan hmun nuam a ni thei ang. India hmar lam thlasik dai tla deuh rengin inkhel ṭhenkhat a bowler te a tihbuai tan tawh laiin, khawthlang tuipuikam thlasik awm lem lo Mumbai erawh tun thleng chuan thimhlim dai in a la tibuai lo chu a nia.

Engpawh chu nise, saipui kal lai India team hi, Lankan Sakeibaknei te hian lo tiding thei tak maw? Tun dinhmunah tak erawh, he Sakeibaknei hi ha bal leh tin bul angin a lang hrih!