Pakistan-in Bangladesh an vaw tla

Cricket World Cup-ah Pakistan-in semifinal beiseina chhi nung turin October 31, Thawhlehni khan Bangladesh chu wicket sarihin an sawp. Shaheens hi point ruk hmuin panganaah an awm a, knockout stage lut turin an khelh hmabakah New Zealand leh England hneh ngei a ṭul bakah an chunga awm an chetsual a ngai bawk.

Eden Gardens-a inkhelah Bangladesh an chak loh avangin World Cup-ah chhiarkawp dan ang thlapin beisei tur an nei tawh lo - tla hmasa ber an ni.

Pakistan an ṭha zawk

Bangladesh-in match hmasa berah Afghanistan an hneh a, hemi hnu hian chak hmel an hmu tawh lo. Semifinal khelh beiseina nei turin Pakistan an hneh a ngai a, ṭhumvawrah an vanneih avangin vuak hmasak an thlang.

Opener Liton Das-a'n bul ṭan ṭha mah se top order dang Tanzid Hasan (0), Najmul Hossain Shanto (4) leh Mushfiqur Rahim (5) te run siam zat belhkhawm chu run kua lek a ni. Mahmudullah (56) leh Shakib Al Hasan (43) te zarah Bangladesh hian 204 runs an siam hram a, over 45.1-ah an thi fai vek.

Pakistan-in chak saltiah an tum lo a, NRR siam ṭhat nan sawp tumin bul an ṭan. Opener pahnih Abdullah Shafique (68) leh Fakhar Zaman (81) ten bul an ṭan ṭha a, a harsa tur zawng zawng an zo vek. Over 32.3-ah 205 siamin hnehna an chang a, wicket thum chauh an hloh. Team ṭha zawk Pakistan an chak.

Engtin zel?

Tun dinhmuna a sang palia awm India, South Africa, New Zealand leh Australia te hian semifinal an luh mai a rinawm. Mahse, an la zo lo - Rohit Sharma hote an tling mai dawn. Team dang pathum zinga chesual an awm a nih chuan Pakistan tan beisei tur a awm ang.

Cricket-ah hian vawi khat chakah point hnih an hmu a, chak loin point an hmu lo. Point inang hmu an awm a nih chuan Net Run Rate (NRR) an en a, football-a a tlukpui chu goal difference (GD) a ni a; NRR erawh ngaihtuahna sen hret a ngai.

Run rate chu innings khata over tina an run siam zat a ni. Tun ṭum World Cup hi ODI a ni a, over 50 an khel. Over 50-ah 300 runs an siam a nih chuan run rate chu over khat zelah run ruk (six runs per over) a ni ang.

Tichuan, net run rate an chhut dan chu an run rate aṭang khan an khingpuite run rate an paih (subtract). A chak zawkin positive run rate a nei ang a, chak lo zawkin negative run rate a nei dawn a ni.

Tun inelna angah hi chuan over 50 hmain vawm hlum vek theih a ni a, hei hi a thleng a nih pawhin over 50 anga chhut tho tur a ni ang.