Min ring rawh u - Poch

Chelsea boss Mauricio Pochettino chuan fan-te chu an hmalak mekna ring ngam turin a ngen a, coach berin ring ngam tura fans a ngen fo a ṭul tawh chuan rin an harsa tihna a ni!

London club hian tun season inelna hrang hrangah match 12 khel tawhin vawi nga chiah an la chak a, an league match hnuhnung berah khan Brentford chu 2-0 a an ngam loh avangin fan-ten an au el hial.

Pochettino chuan, "Fan-te hi kan lam an ṭan a ngai a, chutihrual chuan a lungawi lohnate pai daih mai harsa an ti pawh kha ka hrethiam viau a ni - thil nihphung ve reng a ni e.

"Fan-ten hnehna chan an duh a, chuvang chuan an hrehawm ti lutukin tikhan an che ta mai a ni. Mahse, a pawimawh ber chu kan chunga rinna an nghah a, min rin a ṭul - inrinngamna hian nasa takin hna a thawk thei a ni," a ti.

Brentford laka an tlawm khan Chelsea hi Stamford Bridge-ah tun season league match thum an tlawmna chiah a ni a, mahni mualah a zawnin match li an chak zo lo ta bawk.

Season hman zawh takah khan Chelsea hian table-ah 12-na niin season an khar a, beiseina sang tak nen team thar din tumin Poch hi an la lut - tun dinhmunah erawh kum 51 mi coach hian beisei angin hna a la thawk lo hle.

Blues hi an buaina belhchhah turin, Brentford laka an inkhelah assistant coach Jesus Perez chu a chet dan avangin hnawhchhuah a ni a, Spanish coach hian Brentford technical area aṭanga ball lak a tum a, referee Simon Hooper chuan red card pein a hnawt chhuak.

Poch chuan, "Perez khan sum chawitir leh hrem a phu reng a ni. Dan a bawhchhe miau a, phat buai tur a awm lo. Brentford leh an coaching staff-te pawh kan tih loh tawp tur kan tih avangin ngaihdam ka dil.

"Perez pawhin a tihsual a hre tawh a, hnehna chan a duh em a ni. Team tana tha thawh ve a, inkhelh leh theih vat a duh luatah ball a chuh deuh a ni," a ti a, thiamthu a sawisak lo.

Chelsea hian nizan zanlaiah khan Blackburn Rovers nen League Cup match, round of 16 an khel a, he thu buatsaih a nih lai hian an result kan hre hman ta lo a ni.