King Cup-ah Mane-a'n Al Nassr a chakpui

Saudi Arabia-a knockout hmanga football inelnaah Al Nassr-in Thawhlehni zan khan Al Ettifaq 1-0 in an hneh a, goal awmchhun hi Sadio Mane khung a ni. Saudi Pro league-ah Al Nassr hian Steven Gerrard-a enkawl Al Ettifaq hneh loin season bul an ṭan a, King Cup-ah phuba lain quarterfinal an lut.

Al-Awwal Park, Riyadh-ah hun pangngaiah goal a lut lo. Extra time-ah pawh minute 117-naah Liverpool forward hlui Mane hian vei lam aṭanga aṭanga a ball hmuh chu vawi khatah a pet nghal a, Brazilian keeper Paulo Victor a che hman lo.

First half injury time-ah Al Nassr forward Talisca chu hnawhchhuah a ni a, Al Ettifaq midfielder Ali Hazazi chu minute 89-naah hnawhchhuah a ni leh bawk. Extra time-ah player 10 ve vein an khel a, inkhel pawimawhah kum 38 mi Cristiano Ronaldo a khel tluan.

Inkhelh banah Mane chuan a jersey chu Liverpool tana a khelhpui Jordan Henderson hnenah a hlan. Senegalese forward Mane chuan, "Saudi Arabia hi nuam ka ti a, kei leh ka chhungte an hlim. Ka nu pawhin Saudi hi a hmangaih a, hei hian min tiphur a ni," tiin a sawi.