Real-ah Vinicius a cham zel dawn

Football khawvela player ṭhangduang ber pawl Vinicius Jr chuan kum 2027 thleng Real Madrid tana khel chhunzawm turin contract thar a ziak a, Santiago Bernabeu-ah Brazilian forward hi a cham chhunzawm zel dawn.

Kum 23 mi Vinicius hian kum 2018 khan Flamengo aṭangin Real hi a pan a, Spanish club tan hian inelna hrang hrangah match 235 khela goal 63 khungin, assist vawi 67 a nei bawk a, Real tan player pawimawh a ni.

Brazil international Vinicius chuan, "Madrid fan-te, chibai ule. Contract thar ka ziak thei hi ka lawm takzet a, ka tan chuan mumang thleng dik ang mai a ni.

"Kum tam zawk Real-ah hian ka khelh zel ka beisei a, goal tam tak khungin nomawi tam tak kan chawi ho ka beisei. Inmi hmangaihna avangin lawmthu ka sawi e. Hala Madrid," tiin video kaltlangin contract thar a ziah thu a puang.

Vinicius hi Ballon d'Or sem zawh takah khan parukna niin, khelmual pawn lama vantlang tana a hnathawh ṭha tak avangin Socrates Award hlan a ni bawk.

Brazil tan vawi 25 inlana goal thum khungtu Vinicius hian foundation dinin, an ram Brazil-a mi rethei chenna hmunahte school dinin, zirna lama Brazil-in hma a sawn theih nan sum a seng hnem hle bawk - hei vang hian Socrates Award hlan a ni.

A vun rawng avanga chi inthliarna lam hawia beih tawk nasa tak Vinicius hian khelmual chhung lamah pawh Real tan hna ropui tak thawkin, La Liga (2), Copa Del Rey (1), Spanish Super Cup (2), Club World Cup (2) leh Champions League (1) nomawi a lo chawi tawh bawk.