Mizoramin gold medal lak belh

National Games 2023 neih laiah Mizoram chuan vawiin khan gold medal an la. Taekwondo Men's Group Poomsae-ah Lalthlamuanpuia, Venghlui; H. Vanlalfela, Armed Veng South leh Daniel Lalhumthanga, Chhinga Veng te chuan gold medal hi an la a ni.

Goa-a khawpuia inelna neihah hian Mizoramin a hmain gold medal pakhat a lo la tawh bawk a, nimin tlaia mi nen gold pahnih a la tling ta chiah - inelna neih hmabak an la awm nual avangin medal dang beiseina a la awm.

National Games-ah taekwondo-in gold medal a lak vawi khatna a ni a, taekwondo bik hi kum 1999 aṭanga tel vein kum 23 hnuah gold medal an sual chhuak ta chiah. Mizoram Amateur Taekwondo Association (MATA) chuan hlawhtlinna an chan avangin an lawm thu an sawi.

Mizoram team hi seeded pakhatna an nih avangin ngaihven an hlawh. An elpui ber seeded pahnihna Services erawh an che sualin final round an thleng zo lo. Mizoram erawhin chet sual an nei lo, semifinal round thlengin fal taka hma hruaiin final an lut.

A thiam ber zawnnaah team pali an inlan. Coach R.Lalchhandama kaihhruai Mizoram hian final round-ah hian point 6.36 hmuin an chungnung ber a, an dawtah hian Rajasthan (6.26 point) awmin Arunachal Pradesh leh Assam ten point 6.23 ve ve hmuin bronze medal an la ve bawk.

Tun National Games-ah chuan taekwondo hi Mizoram chetṭhat berna a ni mek. Vanlalhmangaihthangi leh Daniel Lalhumthanga ten mixed doubles huangah silver medal an la a, Lalthlamuanpuia chuan poomsae individual category-ah silver medal a lo la tawh bawk.

Nimin tlai thleng hian Mizoram chuan National Games 2023-ah hian medal a lak tawh zawng zawng chu pali a ni. Mizoram hian infiammi 26 tirin - boxing, judo, sepaktakraw, shooting, swimming, taekwondo, weightlifting, wrestling leh wushu-ah te inelna an hmachhawn ang.

Vawiin hian taekwondo inelna neih chhunzawm a ni dawn. Lunglei nula Lalrinngheti Sailo chuan under 53kg huangah inelna a hmachhawn ang a, taekwondo bika Mizoram inlan theihna hnuhnung a ni tawh dawn a ni.

National Games-ah hian Mizoram Olympic Association team hi kum 1987 aṭangin an tel ṭan a, inelna neih ṭan a nih aṭanga gold medal an lak tawh zawng zawng chu pariat niin, silver medal 12 leh bronze medal 28 an la tling tawh bawk.