Mikhual team-te tual chaina Old Trafford : Manchester United 0 - 3 Newcastle United

Theatre of Dreams ti hiala an sawi 'Old Trafford'-ah Manchester United an mualpho leh ta a, an hmelma Manchester City laka 3-0 a an tlawm hnuah Newcastle United lakah 3-0 bawkin an tlawm. Champion lai Man United hi Carabao Cup aṭangin an tla a, season liam taa League Cup champion puitu Erik Ten Hag-a ban duhtu an pun belh.

Mapgies erawhin nikum final phuba an la a ni ringawt lo a, quarterfinal lut turin Manchester khaw club pahnih Man City leh Man United an hneh. Ten Hag-a hote an hneh theih nan hian Newcastle tan Miguel Almiron, Lewis Hall leh Joe Willock ten goal khat ṭheuh an khung.

A ṭha ber lo deuh

Man United manager Ten Hag-a'n pressure ngah tawh mah se risk a la ngam - League Cup a nih vang a ni thei ang. Man City laka mualpho Man United starting eleven aṭangin player pasarih ngawt a thlak. Captain Bruno Fernandes bakah Marcus Rashford leh Rasmus Hojlund te bench-ah dah an ni.

Magpies player pawimawh paruk Alexander Isak, Sven Botman, Elliot Anderson, Jacob Murphy, Harvey Barnes leh Sandro Tonali te inhliam vang leh hrem vangin an khel thei lo. Eddie Howe-a'n kartawpa Wolves nena inhnehtawk aṭangin player pariat ngawt a thlak ve bawk. Kieran Trippier, Callum Wilson, Miguel Almiron leh Bruno Guimares te an hahdam.

Team pahnih an ṭhat dan berin an lut lo ve ve a, chhuanlam siam tur chu ni se mikhual team Magpies buaina a lian zawk.

Goal thum awm?

Aw, Old Trafford-ah goal thum a lut. Man United-in goal thum an chhuah a, Newcastle-in goal thum an khung. Man City tih theih kha Mapgies pawhin an ti thei a, Man United erawh an zawr hle.

Minute ngana lekah Matt Targett a inhliam a, Almiron a rawn lut. Paraguay international Almiron hi mikhual team tan danglamna siamtu a ni a, minute 28-naah Tino Livramento ball pek chu goal-ah a chantir. Livramento hian Alejandro Garnacho ball chan lai a chhuhsak a, Hannibal Mejbri-a'n a umphak loh bakah awlsam takin Mason Mount leh Sergio Reguilon te a tlan pel! United tlarhnung a pherh.

Minute 36-naah Almiron, Joe Willock leh Anthony Gordon te thawhrah sengin left back Lewis Hall-a'n mawi zetin a volley lut. Man United-in an keeper hlui Martin Dubravka tan hna harsa an siam lo.

Second half-ah pawh thawnthu ngai bawk. Joelinton-a'n mual laiah Sofyan Amrabat ball chan lai chu a tlawh sawnsak a, Joe Willock-a'n ball per chu lain goal lama a khalh phei hnuah box pawn aṭangin goal kilah tak a dah. Minute 60-naa Willock-a goal hi a mawi a, chutihrualin United-in goal ven hna an thawk ṭha tawk lo.

Bench aṭangin Fernandes, Rashford leh Hojlund te luh mah se Man United goal bawh a nat phah lo. Magpies zawkin goal khung belh theihna remchang an nei a, Sean Longstaff-a ball pet chu goal pawnah chiah a kal.

Old Trafford chu

Man United-in an khelmual chhuan taw-lawl Old Trafford-ah pawh an hmang thiam tawh lo a, mikhual team-te tual chaina ang mai a ni tawh. Ten Hag-a hote hian Old Trafford-a match hnuhnung parukah vawi hnih chiah an chak a, an chakna chhunah pawh an chak ṭawk ṭawk bakah an hneh hi Brentford leh Copenhagen te an ni.

Ṭum li dangah erawh Man United hi an chak lo vek. An muala match hnuhnung parukah hian Ten Hag-a hote hian goal 11 tehmeuh an chhuah. Tun season-ah Man United-in khelh dan nghet an nei lo a, inrintawkna an nei lo a, an buai tih zep rual a ni lo.

Man City ṭantuten, "London-ah insawn rawh u, he khawpui (Manchester) hi kan ta a ni," tiin an zai rual a, hemi hnuah Newcastle-in an au el lehnghal. Magpies-in social media-ah Old Trafford-ah entu zat chu 72,000 an ni a, tunah chuan tlem hret tawh ang, tih an ziak. Old Trafford-ah Georgies (Newcastle-a cheng ho sawina) 7,000 vel an awm a, United ṭantu sing ruk chuang aiin an thawm a ring zawk.