Delhi FC an chak

Yan Cheng Law-a enkawl Delhi FC chuan nimin khan tun season I League-ah chak hmel an hmu a, Rajasthan United chu 4-3 in an hneh. Namdhari Stadium-a inkhelah Rajasthan tan Yash Tripathi-a'n hattrick siam mah se Delhi tan Aroldo Da Silva Arruda-a'n goal hnih a khung bakah Gurtej Singh leh Sergio Barboza ten an khung belh.

Delhi tan hian MPL9 best midfielder K. Vanlalhriatzuala chu player pawimawh a ni a, Rajasthan lakah pawh hian a khel tluan. Rajasthan lamah Lalchungnunga Chhangte-in bul a ṭan a, bench aṭangin Lalbiakzuala a inlan bawk.

Zanin dar 7:00 hian Mohammedan-in Shillong Lajong an mikhual dawn. I League-ah team 13 an awm avangin round tinin team pakhat an awl zel. Lajong hi round hmasa berah an tel lo a, zanin hi an vawi khat inlanna tur a ni.

Tun round-ah hian Aizawl FC leh Churchill Brothers inkhel tur a ni a, amaherawhchu RG Stadium, Mualpuiah artificial turf phah ṭhat a nih avangin khelh theih a ni lo - inkhelh hun an sawn. Mizo club hian November 7, Thawhlehni tlai dar 4:30-ah Sreenidi Deccan an hmachhawn ang.