Kan chak loh danah mawh ka phur - Arteta
Arsenal manager Mikel Arteta chuan West Ham an hneh loh chungchangah mawh a phur tih a sawi a, a naute hi Hammers laka 3-1 a an tlawm avangin Carabao Cup quarterfinal lut phak loin an tla.
Nilaini zan last 16 inkhelah Arteta-a'n player a siksawi nasa - kar tawp Premier League match an khelh a bul ṭantu paruk a ti danglam a, player ṭha Declan Rice, Bukayo Saka leh captain Martin Odegaard te chu bench lamah ṭhuttir an ni.
Arsenal defender Ben White-a'n anmahni lamah a tih luh bakah, mualneitu lam tan Mohammed Kudus leh Jarrod Bowen ten khungin hun tawp dawna Odegaard goal khung chu mualpho hliahkhuh nan a tawk zo lo.
Arteta chuan, "Cup inelna pakhat aṭangin kan tla a, pawi ka tiin ka mawhphurhna pawh a ni. Match khelh tur kan ngah a, inelna dang a nih avangin khelh dan phung danglam neih kha ka duh, kan hlawhtling ta lo erawh a pawi takzet.
"Kan chak lohna hi insiamṭhat nan kan hmang tur a ni a, tunah chuan Inrinni zana Newcastle United nen Premier League kan khelh tur atan kan inbuatsaih ang," a ti. EPL bakah FA Cup leh Champions League an la hmabak bawk.
Spanish manager hian goalkeeper David Raya aiah Aaron Ramsdale a luhtir a, ani bakah hian Hammers captain hlui Rice chu fans lamin an lo au nasa hle a, an lo auh dan boruak erawh a inang lo - Rice an lo lawm laiin Ramsdale chu tun hnaia hmun a chan mumal loh avangin an au el.
Rice pawh West Ham ṭantu zawng zawngin an lo lawm vek lem lo, ṭhenkhat chuan an lo au el ve bawk. Inkhelh hmain manager Moyes-a'n duhsak taka an lo lawm tur thu sawi mah se, mipui ngaihdan a inang vek thei lo.
Arteta chuan, "Aaron an auel kha chu a mak lo, fans lamin an duh angin an ti a ni ve mai. Hetiang hunah chuan player chuan a ṭha thei ang bera khelh an tum zawk," a ti a, a midfielder Rice an auh dan chungchang chu mak a tih loh thu a sawi bawk.
David Moyes enkawl West Ham hian season hmasa khan Europa Conference League nomawi an chawi, an player ṭha ber Rice chhuak mah se tunah chuan nomawi beiseina an la nei zel, quarterfinal-ah Liverpool an hmachhawn leh ang.