Cricket World Cup South Africa-in New Zealand an sawp

South Africa-in November 1, Nilaini khan New Zealand an sawp a, Cricket World Cup semifinal an hnaih ta hle. Pune-a inkhelah hian Rassie van der Dussen-a'n 133 runs a siam bakah Quinton de Kock-a'n tun inelnaah a vawi li nan century a vaw chhuak a, 190 runs-in South Africa an chak.

New Zealand captain lailawk Tom Latham-a'n vawm hmasak a thlang a, a tifuh lo. Proteas-in over 50-ah 357/4 runs an siam a, Black Caps tan a tam mah mah - 167 runs siamin an thi fai vek. South Africa hian match sarih aṭangin point 12 an hmu a, an net run rate a ṭhat bawk avangin an hmabak match hnihah chak lo ve ve pawh ni se semifinal an khelh a rinawm tawh zawk.

South Africa opener Quinton de Kock tan World Cup ṭha bik a ni zel a, De Kock hian New Zealand bowler-te chu a lamtir a ni ber. A bul ṭanpui captain Temba Bavuma-a'n 24 runs chauh siam mah se De Kock leh Rassie van der Dussen te inkawp chuan cricket ngainatute tan 'batting class' an la a ni ber.

Chutihrualin Black Caps fielding ṭha hret se, De Kock leh Der Dussen te hi an insiamrem hmain vawm out theih ve ve a ni a, mah se an hun ṭha pahnihah ball an thlauh ve ve. De Kock (114) leh Der Dussen (133) ten century an siam ve ve a, De Kock-a'n pavillion a pan meuh chuan South Africa hian 238 runs an siam. Wicket an hloh tlem avangin David Miller-a'n risk a la thei a, ball 30 lekah 53 runs siamin South Africa-in over 50-ah 357 runs an siam pha hial.

New Zealand tan target a sang mah mah a; run siam tam an tumna lamah player pathum Will Young (33), Daryl Mitchell (24) leh Glen Phillips (60) te chauhin run 10 aia tam an vaw chhuak. Keshav Maharaj-a'n wicket li lain 46 runs a pe a, Black Caps-in 167 runs chauh an siam tihin an thi fai vek.

Vawiin tlai dar 2:00 hian Netherlands leh Afghanistan te an inkhel dawn a, semifinal beiseina chhi nung turin Afghanistan tan hnehna chan ngei a pawimawh ang.