Chelsea an insiamṭha tawh?

Mauricio Pochettino-a'n dawhthei tura Chelsea fan-te a ngen hnu lawkah Blues-in hnehna an chang a, Nilaini zan khan Blackburn Rovers chu 2-0 in an hneh - Benoit Badiashile leh Raheem Sterling ten goal khat ve ve an khung a, Championship club-in a chhanletna tur an nei lo.

Premier League-a an match hnuhnung bera Brentford (2-0) ngam lotu Chelsea tan Blackburn laka hnehna chan hi result hlu bik a ni a, September 27-a League Cup-a Brighton & Hove Albion an hneh hnua Stamford Bridge inkhela an chak leh hmasak ber a ni!

Carabao Cup hian English club zingah ngaihhlut hlawh tawk lo mah se, tun hnaiah club ṭha tak tak an tam tawh avangin League Cup nomawi chawi hi tun hma zawng aiin a hlu tawh bik - Blues manager Pochettino pawhin champion an tum tur thu a sawi zui.

Tottenham Hotspur manager hlui Poch chuan, "League Cup hi kan tan chuan inelna pawimawh tak a ni, tih kan hriat a ṭul. Europe-ah kan inkhel lo a, hei hi Premier League leh January vela kan khelh ṭan tur FA Cup-ah te kan chhawr ṭangkai tur a ni ang.

"League Cup-ah hian kan champion thei tih kan ringhlel tur a ni lo," a ti a, nomawi chawi a tum hle - Blues hian quarterfinal-ah Newcastle United an hmachhawn dawn a, Poch-a beisei anga champion ngawt erawh a awlsam lo ang.

Blues hian tun season-a league match 10 an khelh aṭangin vawi thum chiah hnehna an la chang a, vawi thum draw neiin, vawi li an tlawm. Hei vang hian season la chawhma viau mah se league-ah chuan an champion lo ang, tih a sawi ngam tawh a, European football an khelh loh bawk avangin League Cup leh FA Cup chu Chelsea fan-te tana nomawi beisei theihna a ni.

Chelsea fans tana thu lawmawm dang chu captain Reece James-a'n inkhel bul a ṭan ve leh ta kha a ni a, tun season Premier League match hmasa bera inkhel bul a ṭan hnua bul a ṭan leh hmasak ber a ni - tlarhnung a ho ṭhat bakah goal nawr kawngah a ṭangkai tel a, a vanneih zan ni se goal khung thei a ni hial.

Poch chuan, "Kan tan chuan player pawimawh leh ṭangkai a ni a, ka tan chuan khawvela fullback ṭha ber pawl a ni," a ti a, a defender chu a fak - Thawhṭanni zanah league match khel tura hmahruaitu Tottenham Hotspur an lenchilh dawn avangin Reece-a dam hun hi a fuh hle.