Tata SK 612 LPS Pro Fight Zanin aṭangin semifinal an khel dawn

Mizoram chhunga boxing inelna ngaihhlut Tata SK 612 LPS Pro Fight chu a hmawr bawk a hnai ta, zanin aṭangin semifinal khelh a ni ang. Zan dar 8:00 aṭangin inhnek a awm ṭan dawn. LPS Arena, Falkland Vengah a hmunah en theih a ni ang, in lam aṭang pawhin LPS-ah en theih a ni bawk.

Semifinal a ni tawh a, zanin aṭang chuan professional glove an bun tawh dawn a, round 4 an inhnek bawk ang. Thiam ringawt a tawk dawn lo, fit leh thafei ṭha a hriat dawn - entu lam tan pawh a hmuhnawm tham lehzual tura ngaih a ni.

Zanin inhnek tur zingah NT Lalbiakkima leh Emmanuel Vanlalthlengliana ten flyweight semifinal an khel tur chu mipui ngaihven zual zinga mi a ni. Siaha boxer Nt-a hi LPS Profight aṭanga mi hriat hlawh, ram pawn thlenga tawnhriat a neih hnua lo kir leh a ni.

Melthum tlangval Vanlalthlengliana pawh hi boxer ṭha a ni tih kumin Pro Fight-ah ngei kan hmu tawh a, a hmaa ding zo reng an awm lo. Mizoram huap inelna liana champion turin a ṭha tawk em, tih chu zaninah fiah a ni dawn.

Nilaini zan khan quarterfinal khelh zawh a ni a, flyweight inelna huangah HC Lalramfela'n a khingpui Lalbiakzuala a knockout. Vanlalruatpuia chuan Lalhruaisanga hnek tlu thei bik lo mah se harsa lo takin a chak.

Middle-ah a vawi khat nan F. Lalthanliana Junior a inlan a, minute khat leh second 37 chiah an inbei hman tihin a bitum Teikhang tlangval Vanlalruata a inhnukdawk a, technical knockout-in a chak.

Bantamweight inelnaah Omega Lalramdina'n unanimous decision-in tawnhriat nei lo huang aṭanga tlang Lalpianpuia a hneh. Flyweight semifinal-a intawng turin Vanlalenkawltira leh Lalmuankima ten unanimous decision ve vein Hmingthanmawia leh Lalchhuanawma an hneh.