Liverpool chakna Nunez goal mawi

Nilaini zan khan Darwin Nunez chuan goal mawi bik a khung a, a club Liverpool chu League Cup quarterfinal a hruai thleng - Uruguayan striker hian minute 71-naah goal hi a khung a, Reds chu Bournemouth lakah 2-1 in hnehna a chanpui.

Cherries khelmualah Liverpool an tlangnel a, an vanneih zan ni se goal tam zawk khung thei an ni. Minute 31-naah Cody Gakpo chuan goal hmahruai a khung a, Harvey Elliott-a volley aṭanga ball kal a ke bula tla chu awlsam takin a khung.

Bournemouth-in mikhual team lakah tlawm bik an tum lo - AS Roma aṭanga nipuia an lakluh Justin Kluivert chuan minute 64-naah si phurh sutna goal a khung a, Premier League club a zawm hnua a goal khung hmasak ber a ni.

Mahse, Cherries goal-in Liverpool a beng dai zo lo. Bench aṭanga luhtir Darwin Nunez chuan player 'special' a ni tih pholangin, goal an chhuah aṭanga minute rukna lekah mawi zetin goal a khung a, 2-1 in Liverpool hi an chak daih.

Pound maktaduai 64 man Nunez hian season hmasa ṭan dawn khan Liverpool hi a zawm a, inelna hrang hrangah goal 15 chauh khungin beisei a phak lo. Mahse, tun season-ah Nunez tak tak kan hmu ṭan a, English club-ah a tlangnel ta hle.

Kum 24 mi striker hian tun season inelna hrang hrangah match 14 khelin goal sarih a khung ta der a, assist vawi nga a nei tel bawk - inkhelh zawh ruala "Nunez, Nunez" tia fan-te au rual khan Kop zinga a tlaknat sawtzia a pholang.

Liverpool boss Jurgen Klopp-a'n Nottingham Forest an hneh ṭuma bul ṭan aṭangin player pathum chiah bul a ṭan nawntir a, bul ṭan zingah rin loh takin Mohamed Salah a tel. Mahse, Egyptian forward hian a chance ṭha neih chu goal-ah a chantir thei lo.

Reds tan Elliot leh Dominik Szoboszlai te pawhin chance duhawm an nei a, mahse, an chhawr lo ve ve - Reds hian inelna hrang hrangah match ruk zet chu a zawnin tlawm an nei ta lo. Pathianni zan dar 10:00-ah league match khel turin Luton Town an lenchilh zui ang a, League Cup quarterfinal-ah 3-1 a Arsenal hnehtu West Ham an hmachhawn ang.