Harden-a'n Clippers a zawm

James Harden chuan Philadelphia 76ers aṭangin Los Angeles Clippers a zawm. NBA All-Star zinga vawi 10 tel tawh Harden hi Philadelphia president Daryl Morey nen an inhmuthiam lo a, club dang a pan phah a ni.

Kum 33 mi Harden hi Morey-a chungah a lawm lo, club thar a zawm tur chungchangah 76ers hian inbiakna an tihtawp avangin Harden hian August thla khan an President hi dawt sawi hmang tiin chanchinbumite hmaah a puh.

Morey-a hi an club President a nih chhung chuan 76ers tana khelh a tum tawh loh thu a sawi zui a, a sawi ang ngeiin tun NBA regular season an match hmasa pathumah pawh a inlan lo.

Philadelphia 76ers tan Harden hi kawl reng chi a ni lo a, an inkar chinfelna ṭha ber chu chhuahtir mai a ni. Tunah chuan Harden hian Clippers tan regular season a hmang chhunzawm dawn ta zawk a ni.

Clippers president Lawrence Frank chuan, "James hi NBA player zingah chuan a ṭha leh game siam thiam berte zinga mi a ni. A lian ṭhain hmathlir a nei thui thei êm êm a, amah leh midang tana remchang siamsak tura mi ṭha bik a ni tih kan chiang," a ti.

LA Clippers hian nimin zing inkhelah Los Angeles Lakers chu 130-125 in an hneh lo, vawi hnih an tlawmna niin ṭum thum an chak tawh thung. November 7, Thawhlehni zingah New York Knicks nen an inhmachhawn zui leh ang.