Bayern an mualpho; Kane-a'n nomawi a chân!

Germany-ah thilmak a thleng. German football-a roreltu Bayern Munich chuan third division club Saarbrucken hneh loin DFB Pokal aṭangin an tla. England captain Harry Kane a khel lo a, amaherawhchu nomawi beiseia Germany pantu hian DFL Supercup a chân hnuah DFB Pokal a chân leh ta.

Ludwigsparkstadion-ah entu 16,000 lek an leng a, mualneitu FC Saarbrücken hi third division club chauh an ni bawk. Bayern hi chak chiang tura ngaih a ni a, goal engzat nge an khung ang tih zawhna a ni zawk.

An inhnehtawk

Thomas Tuchel-a'n bench-ah Kane-a dah mah se bul ṭantu zingah Manuel Neuer, Joshua Kimmich, Thomas Muller leh Leroy Sane ten bul an la ṭan vek tho. Saarbrücken erawhin khawvel hriat phata lar pha pakhatmah an kawl lo a, Bayern squad-a awm pha chin hi chu bul ṭan tur vek an ni.

Bayern hian rin ang ngeiin bul pawh an ṭan ṭha a, minute 16-na lekah Thomas Muller-a'n box pawn aṭangin kawh zetin a pet goal. Bavarians-in inkhel thunun chhunzawm mah se goal hmuh tur a awm lo a, minute 25-naah hliam vangin defender Matthijs de Ligt lakchhuah a ngai.

First half tawp dawnah Bayern an inthlah dah hret a, Frans Kratzig-a'n ball a hloh hnuah Lukas Boeder ṭha taka la lutin mahni hma sial lo taka a ball pek chu Patrick Sontheimer-a'n awlsam takin a khung.

Saarbrucken an chak

Halftime-ah 1-1 a ni a, third division club-in Bundesliga thununtu team lakah beiseina thar an nei. Second half-ah erawh Bayern bawk an chungnung a, Leroy Sane-a'n goalkeeper tan hna a rawn siam. Sane vanneih zan a ni lo a, Kingsley Coman-a ball pet pawh keeper Tim Schreiber-a'n a dang.

Thomas Muller pawhin chakna goal khung theihna hun ṭha an nei a, Bayern-in inkhel an thunun hle. Mahse, goal a lut lo a, inkhel a tawp lo. Injury time-ah Mohamed Amine Naïfi ball pek chu substitute Tim Civeja-a'n umin mual dinglam aṭanga a cross ṭha zet chu Marcel Gaus-a'n a khung.

Goal luh hun hi injury time-ah pawh minute rukna a ni a, heti chung hian Bayern-in si phurh sutna hun an la insiam hman tho. Serge Gnabry-a'n box chhung aṭangin goal-ah pet pawp mah se an dansak, handball-ah ngaiin Bavarians-in penalty an beisei. Mahse, referee-in penalty spot kawk loin mual lai kawkin hun tawp hamrik a ham ta zawk.

Mualphona chu

Optus Sports-in a tarlan danin Bayern hlutna hi a let 144-in a tam zawk a, Tuchel-a hote tan mualphona tih loh rual a ni lo. Chutihrualin Saarbrucken tan erawh hun duhawm bik a ni a, an club chanchina an hun tawn ropui ber ang hiala sawi theih a ni.

Bayern hian kar liam ta khan Darmstadt 8-0 in an sawp a, tunah Saarbrucken an hneh lo. Kar khat chhung leka thil inthlak danglam dan hi thilmak a tling. Thomas Tuchel chuan, "Kan chak chuan kan lawm tlang a, kan chak loh pawhin kan tuar tlang ang. Tun hi thawhpuite sawisel hun a ni lo. Match 14 chhung hneh loh nei loin kan kaltluang a, mahse tuna kan chak lohna hi knockout a nih avangin a pawi," tiin a sawi.

Tuchel hian chhawr loin an club top scorer Harry Kane chu bench-ah a dah tluan a, hemi chungchang hi an insawifiah. German manager Tuchel chuan, "Kane kha a malpui a nuam lo deuh. Substitution pakhat ka nei a, inhliam palh awm theih a nih avangin ka hmang zo duh lo. A tawp thlengin player zawng zawngin an khel tluan thei em tih kha ka hre duh," tiin a sawi a, extra time an thlen tak loh avanga Kane a khelh loh thu a sawi.

Bayern Munich hian kartawpah Borussia Dortmund an tlawh dawn a, Bavarians-in pressure an ngah tawh. Bundesliga-ah Bayer Leverkusen-in hma an hruai mek a, Bayern hian Dortmund hi an hneh lo a nih chuan Xabi Alonso hote nena an inkar a zau sawt ang.