Hneh loh tawng lo Mohun Bagan

ISL champion lai Mohun Bagan chuan an nomawi humhim an tum tih khelmualah an pholang zel a, Nilaini zan khan an mikhualna ramah Jamshedpur FC chu 3-2 in an hneh - match li an khelhah vawi li an chak ta.

Men of Steel (Jamshedpur sawina) tan Mohammed Sanan chuan minute rukna lekah goal hmahruai a khung a, kum 19 mi forward tan ISL-a a goal khung hmasak ber a ni a, goal hlu bik a ni.

Mahse, Sanan-a goal khung hi Bagan chhaih kawlhna mai a ni. Kolkata club hian Armando Sadiku hmangin minute 29-naah si phurh an sut a, second half-ah Liston Colaco leh Kiyan Nassiri ten an khung ve leh bawk.

Jamshedpur lamin awlsam taka tlawm erawh an duh bik lo. Steve Ambri chuan hun tawp nan minute li chauh a awm tawh tihah penalty aṭangin goal a rawn khung ve leh a, hun tawp thlenga goal dang awm tawh loin 3-2 in Bagan an chak.

Men of Steel tan PC Laldinpuia chuan inkhel bul ṭanin, Ricky Lallawmawma erawh bench lamah a awm tluan thung a, Bagan midfielder Lalrinliana Hnamte chu bench-ah a awm bawk.