Sir Bobby Charlton a thih chhan an sawi

October 21-a thi Sir Bobby Charlton thih chhan chu court-ah sawichhuah a ni a, Manchester United legend hi a tluk sual vanga thi niin court-ah hian sawi a ni.

Sir Bobby Charlton hi Macclesfield General Hospital-ah kum 86 mi niin a thi a, Cheshire Coroner's Court-a a thih dan chungchang sawinaah a thih dan hi sawichhuah a ni.

England player ropui ber ang hiala tam takin an chhal Sir Bobby hian dementia (rilru lam buai) natna neiin, hetiang natna neite enkawlna bik The Willows, Knutsford-ah a awm.

Hetah hian a a ṭhutna aṭanga a ding chhuak tur chu chesualin, a bula tukverh chu a tauh palh nia sawi a ni a, senior coroner Jacqueline Devonish chuan Sir Bobby thihna chu chetsual palhna avanga thleng, tiin a tawp a khar a ni.

Sir Bobby a chetsual tirh hian a hmuna staff-te chuan uluk taka endik nghalin, a taksaah hliam hnuhma engmah an hmu lo a, mahse, a hnuah a hnung lamah vung a awm tih an hmu chhuak.

Hemi hnu hian medical lama mithiamte amah endik tura chah zui niin, a bul damdawi in hnai berah hruai nghal a ni a, a hnuah Macclesfield General Hospital-ah hruai niin, ni nga hnuah a hliam tuar loin a thi.

Sir Bobby Charlton hian a vanglai chu Manchester United-ah hmangin, Red Devils tan match 758 khelin, goal 249 zet a khung a, league nomawi pathum bakah FA Cup (1), FA Charity Shield (2) leh European Cup (1) ah te champion nomawi a chawipui.

United a chhuahsan hnuah hian club tenau Preston North Ednd, Waterford United, Newcastle KB United, Perth Azzurri leh Blacktown City tante a khel a, England tan match 106 khelin goal 49 ngawt a khung a ni.

England hi kum 1966 khan World Cup nomawi a chawipui a, Golden Ball dawng zuiin an champion theih nana player langsar a ni - kum 1966-ah hian Ballon d'Or a dawng bawk a, kum 1967 leh 1968-ah pahnihna a ni bawk.