Tlai dar 2:00-ah Aizawl FC Vs Real Kashmir Kan chak ngei ka ring - Standly Rosario

Aizawl FC-in Mizoram Premier League nomawi an chawina hmun RG Stadium, Mualpuiah tun season I League match-ah hnehna an la chang lo. Mizo club hian vawiin tlai dar 2:00 hian Real Kashmir an mikhual dawn a, Standly Rosario chuan Mizo mipuite tana chak ngei an tum thu a sawi.

Aizawl FC-in an mualah match li an khel tawh a, an khingpui nen an inhnehtawk vek. Mizo club hi Mohun Bagan nen an match hmasa berah goal awm loin an inhnehtawk a, hemi hnu hian Chennai City (1-1), Punjab FC (3-3) leh Churchill Brothers (2-2) nen point an insem vek.

Stnadly Rosario hote hian tun season-ah Indian Arrows chiah an la hneh a, khualmuala match thum dang an khelhah Gokulam Kerala nen 1-1 in an inhnehawk. Mizo club hian Imphal-ah Neroca (1-0) leh Trau (2-1) an hneh lo a, match riat an khelh tawha vawi khat chauh an la chak avangin AFC hian point thum hmuh an harsat tih a chiang.

Aizawl FC-in Mizo keeper ṭha pathum Lalremruata, Zothanmawia leh Lalawmpuia te an kawl a, goalkeeper pathum hian tihsual an neih leh ṭhin avangin AFC-in point an hloh chhanah mawhphurtu zingah a tel. Standly Rosario chuan, "Tihsual chu a awm ve tur a ni a, an insiam ṭha em em ang. Real Kashmir aṭang hian tlarhnung kan thuam ṭhat a pawimawh a ni," tiin Vanglaini a hrilh.

Mizo club hian match hmasa bera Mohun Bagan nen an clean sheet hnuah match sarih khel leh tawhin goal an chhuah vek a, chhuanlam tur erawh an nei. AFC hian match hnuhnung pahnihah an defender pawimawh Joseph Adjei hrem vangin an chhawr thei lo a, Standly-a'n a duh ang thlapin tlarhnung a la rem lo.

Aizawl FC manager Standly Rosario chuan, "Joseph kan chhawr thei tawh dawn a, Kassaga nen an inkawp dawn. Ṭum dang zawng aiin kan tlarhnung a phui ngei ka ring. Club ṭhenkhat chuan goal khung harsatna an nei a, kan club erawhin goal kan khung ziah. Goal kan chhuah leh ṭhin hi kan tuar a, Joseph leh Kassaga inkawp hi kan ṭhatpui ngei ka ring," tiin tlarhnung tih phui an tum thu a sawi.

Aizawl FC-in tunah hian foreigner paruk Abdoulaye Kanoute (Mali), Alfred Jaryan (Liberia), Joseph Adjei (Ghana), Justice Morgan (Nigeria), Matias Veron (Argentina) leh Richard Kasagga (Uganda) te an nei mek a, hman theih turin an inpeih vek.

Standly Rosario chuan, "I League danin min phalsak angin foreigner pangain bul an ṭan dawn. Mizo player-te pawhin theihna sang tak an nei a, kan winger-te hi kan goal nawrna ber pakhat an ni. Isak-a damlohna vangin kan chhawr thei dawn lo a, Remsanga leh Ramhlunchhunga te an awm avangin kan buai phah lo ang. Kan mualah kan la chak lo a, Real Kashmir nen hian kan chak ngei ka ring," tiin foreigner-te inkhel tura an inpeih thu a sawi.

ISL club ATK aṭangin Sena Ralte-in Real Kashmir a zawm a, vawiin hian a inlan ngei a beiseiawm. Scottish coach David Robertson chuan, "Tawnhriat nei defender kan nei thar hi a lawmawm a, bul a ṭan ka beisei," tiin a sawi a, Mizo player-in bul a ṭan ngei a rinawm.

Real Kashmir coach Robertson chuan, "Artificial turf hi kan tan harsatna a awm lo a, kan home ground pawh artificial turf tho a ni. Khaw vawt chungchangah pawh Aizawl aia khaw vawt zawk Kashmir aṭanga rawn kal kan ni a, ṭha taka kan khelh theih kan beisei. Aizawl FC hi an mualah chuan team ṭha ber zinga mi an ni a, point kan hlawhchhuah chuan kan lawm ang," tiin Vanglaini a hrilh.

Aizawl FC    02:00 PM    Real Kashmir FC

East Bengal    05:00 PM    Indian Arrows

Churchill Brothers    05:00 PM    Neroca FC

Gokulam Kerala    05:00 PM    Trau