FA Cup Quarterfinal Everton khemualah Chelsea an leng lut dawn

Tunkar tawp hian FA Cup quarterfinal khelh tur a ni a, Inrinni zan dar 11:00-ah Premier League champion lai Chelsea chu Everton khelmual Goodison Park-ah an leng lut ang a; Pathianni zan dar 7:00 khian Arsenal chuan Watford an lo mikhual bawk ang. Inkhel hi Sony Six-ah live a ni dawn.

Hliam tuar pahnih

Chelsea hi Champions Lea-gue aṭanga pet chhuah hlim an ni a, Blues hian last 16-ah Paris Saint-Germain chu 4-2 in an hneh lo. Everton pawhin an match hnuhnung berah goal hniha hma an hruai hnuah West Ham chu 3-2 in an inlehthal tir a, chak mamawh ve ve an ni.

Guus Hiddink-a'n hliam vangina a star player chhawr theih loh tur a ngah a, defender Kurt Zouma a la khel theih dawn loh chian bakah John Terry dinhmun a chiang lo bawk. Diego Costa leh Eden Hazard-te chu hliam vangin an inkhelh theih a beiseiawm loh bawk.

Roberto Martinez pawhin hliam vangin Tony Hibbert leh Tom Cleverley a la chhawr theih a beisei awm chiah lo a, Gareth Barry leh Aaron Lennon-te erawh an inlan theih beisei a ni thung.

Blues leh Toffees-te hi FA Cup bikah vawi kua an inhmachhawn tawh a, heng zinga parukah ngawt hian London club hian hnehna an chang thei. Intawn tawhna langsar zingah chuan kum 2009 final khan Wembley-ah Blues hian 2-1 in hnehna an lo chang tawh a ni.

Arsenal vs Watford

FA Cup champion lai Ar-senal hian fifth round-ah February 20 khan Emirates Stadium-ah Hull City chu goal awm loin an inhnehtawk pui a, hemi hnu hian Gunners hian a zawnin match li chhung hnehna an chang zo lo. Thawhlehni zan khan replay khelh niin Arsene Wenger-a naute hian 4-0 in hnehna an chang a, an phur vanglai a ni.

Gunners hi an khelmuala inkhel tur mah nise hliam vanga buai thei dinhmunah an ding mek. Defender rinrawl Laurent Koscielny a la khel thei dawn lo a, Hull an hneh ṭuma hliam tenau tuar Gabriel Paulista, Per Mertesacker leh midfielder Aaron Ramsey dinhmun a chiang lo bawk.

Team pahnihte hi FA Cup bikah vawi nga an lo inhma-chhawn tawh a, Gunners hian vawi li hnehna changin vawi khat an chak lo thung.

Gunners hian FA Cup-ah anmahni khemuala Premier League club an hmachhawn hnuhnung 21-ah an tlawm miah lo a, vawi 15 hnehna changin vawi ruk chu an khingpuite nen an inhnehtawk. An khelmuala an hneh loh hnuhung ber chu Leeds niin kum 1997 daih tawh kha a ni.

United vs Hammers

Kum dang ang chu nise Manchester United hi semi-final lut tur chiangsaah a ngaih theih. Mahse tun season-ah erawh Pathianni zana an khing-pui tur West Ham hi team ṭha zawk an ni.

League match 28 khelh tawh aṭangin United hian point 47 an hlawh chhuak tawh a, table-ah parukna dinhmun an luah mek. An chung chiahah hian an khelh zat ang tho khelh aṭanga point 49 hmu thei Hammers hi an awm mek a ni.