BCA-in Ryders tlan pel

Zarkawt BCA-in an theihna lanchhuahtir turin hun harsa an mamawh a, Chatlang Ryders-in an rumṭhaih hnuah BCA an harh chhuak a, Marova Me-morial Basketball champion team-in semi-final kawng an zawh leh ta.

Ningani zan Mizoram Super League Season 2-ah BCA-in anmahni ang bawka bul ṭan ṭha lo Chaltlang Ryders chu 73-55 in an hneh a, state pawn player pahnih ngawt la lut Ryders-in MSL khel zel turin relegation playoff-ah hnehna an chan a ṭul dawn.

Inkhelh hmain 'rele-gation battle' hming vuah-in boruak lian viau angin lang mah se MSL club-te'n tlak an hreh tak tak niin a lang lo. Ryders leh BCA inkhel a hmuhnawm loh ang bawkin inkhel entu an tam lo.

Game dul takah Chal-tlangin bul an ṭan ṭha zawk. First quarter-ah 16-11 in hma hruai mah se an hun ṭha neih an hman ṭhat loh avangin halftime a nih meuh chuan 33-20 in BCA-in an lehthal tawh. Inkhelh banah Ryders coach Peter Lalrintluanga chuan, "Referee tan hmuh vek theih a ni lo a, amaherawhchu hma kan hruai belhchhah theihna turah khan BCA hamṭhatna turin thutlukna an siam hnem a ni," tiin Vang-laini palai a hrilh a, ngaihtuah zui theih tak a ni.

Hun chanve hnu lamah BCA veteran player-te an cheṭha a, squad ṭhatna langin Ryders-in kawng tinrengin an ngam lo. Bul ṭan ṭha lo Michael F. Lalawmpuia (20 pts) a langsar a, Albert Lalram-chhuana (8 pts), Jackson Lalrintluanga (8 pts), Henry Lalramngaihawma (8 pts), David Lalruatfela (9 pts) leh PC Lalmuan-sanga (10 pts) ten an thlawp ṭha bawk.

BCA tan inkhelh ṭan-tirh lama che ṭha Matthew Remtluanga hun tawp lam-ah a reh thung a, MSL2 finalist hian chiang zetin hnehna chang mah se an ṭhatna tak tak an la lantir lo. Zarkawt BCA hian thlawptu ṭha zawk an nei a nih phawt chuan relegation playoff khel tur ni loin champion thei tur team an ni.