Anfield-ah Manchester United an zawr

Manchester United ṭantute tana hriatthiam har takin referee-in Liverpool penalty a pe a, goal hnih luh chhan erawh Michael Carrick tihsual vang liau liau a ni. Anfield-ah Louis van Gaal-a hoten harsa miah loa dan theih tura ngaihah goal hnih an chhuah a, chutihrualin Spanish keeper David de Gea chet ṭhat vang leh Liverpool player-te finishing ṭhat tawk loh vangin Jurgen Klopp-a hoten goal tam zawk an khung lo.

English club inhal Reds leh United-te European compe-tition-a an intum hmasak berah Europe-a record nei ṭha zawk Liverpool-in Daniel Sturridge-a penalty leh Roberto Firmino goal hmangin 2-0 in an chak. Old Trafford-ah March 17 hian second leg khelh tur la awm mah se Red Devils-in harhthar lehzualna an chang a nih ngawt loh chuan Liverpool quarterfinal kalkawng hi dan theih niin a lang tawh lo.

Reds an vul

Ningani zan inkhelah minute 15-na lekah Nathaniel Clyne-a'n United winger Memphis Depay lakah penalty a hlawh chhuak a, Sturridge-a'n goal-ah a chantir. Minute 75-naah substitute Carrick-a tihsual zarah Adam Lallana pass chu awlsam takin Roberto Firmino-a'n a khung leh bawk.

Inkhelh ṭan hma chu ni se German coach Klopp hi 2-0 ah an lungawi ang a, inkhelh banah erawh quarterfinal ticket an la nghal lo chu a ui khawp ang. Reds-in Sturridge, Philippe Coutinho leh Lallana-te hmangin goal khung ngei ngeina tur chance nei mah se ṭum dang ang bawkin United keeper David de Gea a khel ṭha a, Van Gaal-a naute mualpho lutuk tur a hliah khuh.

Liverpool coach Jurgen Klopp chuan, "Anfield boruak nung ṭha tak tawngtu ka ni hi vannei ka inti a, Livepool kan hriat dan ṭhin pawh a ni. Team ti phur tura tha leh zung thawh zawng zawngte chungah ka lawm hle a ni. Manchester United an nih tawh hi chuan goal chance insiam a harsa a, first half-a goal tam zawk kan khung lo kha pawi mah se thil awm dan chu a ni si. Goal hnihna kan khung thei kha a lawmawm a, second leg khelh tur a la awm avangin chak chiang kan ni lo a, chutihrualin dinhmun ṭha takah kan ding," tiin inkhel entu mipui a fak.

Vannei vanduai

Goal an chhuah danah United an vanduai a, amaherawhchu goal tam zawk an chhuah loh bakah Marouane Fellaini-a'n German midfielder Emre Can a tlawh vangin red card a hmu lo hlauh bawk. Red Devils an ṭha tawk lo a, an vanneina leh vanduaina a inzat viau bawk.

United manager Louis van Gaal chuan, "Goal hnih kan chhuahna kha chu a ho lam hret a, chutihrualin Liverpool player-ten pressure an pek ṭhat avangin kan goal bawh a na lo a, vawi khat chauh goal zawnah kan pet erawh a lungawi thlak loh. Second leg khelh tur kan la nei a, Liverpoool supporter-te boruak siam ang kha Old Trafford-ah an siam ve a nih phawt chuan thil thleng thei lo a awm lo," tiin an la tlak bik loh thu a sawi.

An sel e

United legend Paul Scholes chuan, "Manchester United hian season tinin Premier League leh Champions League nomawi hi an er pha tur a ni. Pound maktaduai 300 an hmang a, league-ah paruknaah an awm. Champions League group nemna tak pawh paltlang zo loin Europa League-ah an tla thla. A nihna takah chuan Barcelona, Real Madrid leh Bayern Munich-te elpha tur an ni," tiin a club hluite khelh danah a lungawi lo hle.

Kum 41-a upa Scholes chuan, "United hian an nih tur ang hi an phak lo. Liverpool-in tih tum an nei a, United erawh an khel mawl tawp a ni. Player-te'n social media kaltlangin ngaihdam an dil tawh lo ngei ka beisei, social media vel ngaihtuah loin khelmual chhungah inkhel rawh se. United lakah engmah beisei san theih a ni tawh lo a, tunah chuan Arsenal tih ṭhin dan angin league-a palina nih leh FA Cup nomawi a lungawi a ni," tiin Arsenal lawmna ṭhina an lawm ve mai a ṭul tawh thu a sawi.

Manchester United-in Pathian-ni zan dar 9:30 hian FA Cup quar-terfinal-ah West Ham United an hmachhawn dawn a, Liverpool erawh FA Cup-ah beisei tur an nei tawh lo a, Premier League-a an hmachhawn tur Chelsea an la dam avangin tunkar tawpah match an nei lo. Reds hian an match hmasa berah Manchester United bawk an hmachhawn dawn a, Old Traf-ford-ah Europa League quar-terfinal ticket la turin an zin ang.