Dortmund khelmualah Tottenham an mualpho
Ningani zan Europa League last-16 first leg inkhelah Premier League club ṭha Tottenham chu German club Borussia Dortmund lakah 3-0 in an chak lo a, kar leh Ningani khian White Heart Lane-ah second leg khelh leh tur a ni ang.
Inkhel dangah Gary Neville-a enkawl Valencia chu an elpui Athletic Bilbao lakah 1-0 in an chak lo bawk. Goal awm chhun hi Raul Garcia khung a ni.
Spurs an chuai
Mauricio Pochettino-a'n Tottenham a enkawl hnua a gmae 100-na a thlen zan hian an match hnuhung bera Arsenal nen an inhnehtawk ṭuma player pasarih ngawt a thlak dang lam a, Signal Iduna Park-a inkhelah Dortmund tlarhnung an chhaih buai pha lo.
Dortmund tan tunlai a striker ngaih-ven hlawh ber pawl Pierre-Emerick Aubameyang chuan minute 30-naah an hmahruaina goal a tauh lut a, second half-ah Marco Reus chuan goal hnih a khung zui bawk.
Tottenham hian tun season-a an chak loh chian ber ṭum an tawng a, mahse Pochettino-a'n team a siksawi dan
aṭang chuan league title lak an beiseina a lian zawk tih a hmuh theih. Spurs star player rual Eric Dier, Harry Kane, Mousa Dembele leh Erik Lamela-te chu bench-ah ṭhut tir an ni.
Eng nge an sawi
Tottenham boss Pochettino chuan, "Tun season-a a vawi khat nan 3-0 in kan chak lo a, sawifiah thiam a harsa. Ka naute khelh dan khan duhthu a sam lo. Aston Villa nen kan inkhelh turah rilru kan sawr bing leh phawt ang a, chumi hnuah second leg kan ngaihtuah ang," tiin a sawi.
Dortmund manager Thomas Tuchel chuan, "A tir phat aṭangin Spurs kha kan nawr na nghal hle a, goal nei vat lo mah ila kan chhaih buai hneh hle chuan ka hria. Ka naute khelh danah ka lawm a, second leg-ah pawh hnehna kan chan tlang theih ngei ka beisei," a ti.
Team pahnih te hian Pathianni zan hian league match an khel leh nghal ve ve dawn. Dortmund hian dar 10:00 hian league match-ah Mainz an mikhual chhunzawm leh ang a, chak lo zawk Spurs pawhin dar 9:30-ah Aston Villa khel turin Villa Park an pan bawk ang.
Valencia chak lo
Estadio de San Mames-ah ruah a sur nasa hle a, inkhelh chawlh lailawk chu ngai em lo mah se khelmual chhungah tui a tam hle.
Athletic Bilbao tan Raul Garcia chuan minute 20-naah he inkhela goal awmchhun hi a tauh lut a, Aritz Aduriz chuan an goal hnihna tur khung turin a hun ṭha neih a chhawr ṭangkai lo thung.
Valencia coach Neville chuan beisei an la neih thu sawiin, "Chak loh hi chu engtik lai mahin a lawmawm ngaih loh, mahse Mestalla-ah kan la inkhelh dawn avangin beiseina kan la nei sang hle. Ruah a tam avangin inkhelh a harsa a, team phanihte khan hun harsa tak karah theihtawp kan chhuah a ni," a ti.
Valencia hian La Liga khelh chhun-zawm turin Pathianni zan dar 10:30 hian Levante khelmual an pan ang.