Bale-a dinhmun ngaihtuahtu Verheijen

Wales assistant manager hlui Raymond Verheijen chuan tun hnaia inhliam vanga buai reng Gareth Bale chu Real Madrid-in an enkawl uluk loh avangin a career tan a pawi thui thei niin a sawi.

Kum 26-a upa forward hi tun season-ah hliam vangin a buai reng a, tun hnaiah chawn hliam vanga thla hnih zet a chawlh hnuin match hnih a khel leh tawh a, goal khat a khung.

Fitness coaching lama hming chher tak Verheijen chuan, "Bale hian season tin hliam vanga buai reng a duh lo a nih chuan profes-sional taka amah enkawl theitu club a zawn a ngai a ni," tiin an ram innghahna player chu Real-in an chhawr rim lutuk niin a sawi.

Gareth Bale hian kum 1958 hnua Wales-in tournament liantham an khelhna hmasa ber ni tura Euro 2016 an in pet kaina kawngah a thawhhlawk hle a, match 10 inlanin goal sarih a khung.

Mahse tun hnaiah hliamin a tihbuai ngun avangin Wales thu-nei-tute chuan Euro 2016-ah an thiampuipa hi ram aiawha a inlan theih loh mai an hlauthawng a ni.

Real Madrid chuan Verheijen ṭawngkam chungchangah hian thuchhuah an la nei lo a, Pathianni zan dar 1:00 khian khualmualah Las Palmas chu La Liga match khel turin an lenchilh ang.