Pathianni zanah Bagan

I League champion lai Mohun Bagan chuan Pathianni zan dar 7:05 hian Mumbai FC an mikhual dawn a, dar 7:00-ah DSK Shivajians chuan Sporting Goa an lo mikhual ve bawk ang. Vawiin tlai dar 4:30 hian North East aṭanga I League khel hmasa ber Shillong Lajong-in Goan club Salgaocar an tlawh dawn a, Lajong hi an chak a nih chuan Aizawl FC tan result ṭha a ni ang.

Pathianni zana Mari-ners leh Mumbai FC inkhelh bakah Lajong leh Salgaocar inkhel hi Ten Action-ah a en theih ang.

Team pahnihte hi February 10 khan an lo inkhel tawh a, hemi ṭum hian goal a lut lo. Hemi hnu hian Bagan-in inelna hrang hrangah match nga khel leh tawhin chak loh an la nei miah lo a, an match hnuhnung ber AFC Cup-ah South China chu 4-0 in an sawp a, Jeje Lalpekhlua chuan goal a khung nghe nghe.

Bagan hian champion nomawi humhim turin dinhmun ṭha takah an ding a, match 10 an khelh tawh aṭanga point 22 hmuin hma-hruaitu an ni mek. An-mahnih hnaih bertu Bengaluru hian an point hmuh zat ang hmu ve mah se Mariners hi match khat-in an khel tam zawk a ni.