Chhinga Veng an chak chiang

Nimin khan Chhinga Veng chuan Republic Veng leh Chanmari lo pet chhuak tawhtu Durtlang Leitan lakah goal an sur tir a, 6-1 a sawp chungin NECS Cup 2016 quarterfinal an inpet kai.

Lammuala inkhelah Chhinga Veng tan Vanlallawma chuan hattrick a siam bakah R. Lalṭanpuia, Rochharzela leh Christpher Lalhruaitluanga ten goal khat ṭheuh an khung a, Leitan tan Lalrinsanga chuan goal khat khung ve mah se awmzia a nei thui lo.

Chhinga Veng FC-in Mizoram Football Association buatsaih MFA Cup an khelh dawn avangin player ṭhenkhat an chan dawn a, quarterfinal aṭang chuan an ṭhat dan berin an khel thei tawh dawn lo.

Inkhel dangah Aizawl khawpui pawn team zinga last 16 inpet kai thei awmchhun Keifang chu Venghlui lakah 2-1 in an chak lo thung. Venghlui tan hian Thasiama leh KC Larchhuakmawia ten goal an khung. Inkhel hnuhnung berah Bethlehem VT-in PC Zosanga goal hnih bakah Michael Lalneihtira leh Amos Lalnienga te goal hmangin Salem Veng an sawp.

Vawiin hian last 16 khelh zawh a ni dawn a, chhun dar 12:00-ah Mission Vengthlang leh Vaivakawn an intum anga, chawhnu dar 2:00-ah Ramhlun South leh Chite Veng an inkhel ve leh bawk ang.