Vawiin chawhnuah Aizawl FC Vs East Bengal

I League khel turin India ram club hlun East Bengal-in Mizoram an rawn tlawh a, an player rawn hruai tel pawh French defender Bernard Mendy, South Korean forward Dong Hyun-Do bakah Nigerian striker Ranti Martins leh defender Bello Rasaq te an ni. Red and Gold Brigade hi champion thei tur zinga mi an ni a; vawiin tlai dar 2:30-ah Aizawl FC nen RG Stadium-ah an inkhel dawn, football tui tan en loh phal chi a ni lo.

Point hlu tak chu

Aizawl FC-in an hnuai chiaha awm Salgaocar nen point kua ve ve an hmu a, relegation pumpelh turin East Bengal an hneh a ṭul. Goan club Salgaocar hian an mualah Kolkata club hi 3-1 in an hneh a, MPL champion tan point thum hlawhchhuah hi vana rah a ni bik lo.

East Bengal-in match hnuhnung pahnihah Salgaocar leh DSK Shivajians an hneh lo a, point 17 hmuin khelh zat inangah hmahruaitu Mohun Bagan point ngain an pha lo. Bengali coach Biswajit Bhattacharya hote hian champion an tum miau avangin point thumah chauh an lungawi ang.

Mala malsawmna

East Bengal hmachhawn tur Aizawl FC hi Bengali coach Jahar Das-a thu hnuaiah khel mah se manager K. Malsawmkima pawhin a remhriatna leh thiamna team tan a thawh hnem hle.

Mizoram Premier League champion Aizawl FC hian coaching staff thar hnuaiah RG Stadium-ah chak loh result an la nei lo a, match hnih khel tawhin Shillong Lajong an draw hnuah Mumbai FC an hneh. East Bengal an hmachhawn hma hian Aizawl FC hi an zin chhuak a, Bengaluru FC hneh lo mah se Mumbai FC nen an inhnehtawk.

Pre match press conference-ah Aizawl FC defender Lalramchul-lova chuan, "Spanish coach Retamero kha coach ṭha tak an ni a, a hnuaia kan khelh dan pawh sawisel tur ka hre lo. Amaherawhchu coaching staff thar hnuaiah kan team boruak a ṭha a, team pawh kan phur zawk," tiin Kolkata club hmachhawn tura an rilru a inpeih thu a sawi.

Aizawl FC hian inhliam vangin Mum-bai FC lama goal ropui khungtu Albert Zohmingmawia leh Shillong Lajong lama goal khungtu H. Lalmuankima bakah defender pawimawh Lalchhawnkima leh Immanuel HS Lalṭhazuala te chu an chhawr thei dawn lo. MPL champion-in tlarhnung an thlak danglam hmel loh a, head coach Jahar Das-a'n keeper-ah I League-a experience nei ṭha ber an chhawr dawn a tih avangin Soram Porei-a'n starting eleven a chan hmel bawk.

I League-a Aizawl FC hruai thlengtu coach Mala chuan, "Defensive game kan zir a, mimal chuan kan veng lo ang. Chak tumin kan khel dawn a, Pathian zarah kan chak ngei pawh ka ring," tiin a sawi a, a vawi khat nan Nigerian striker Joel Sunday-a'n starting eleven a chan tur thu a sawi bawk.

Foreigner pali

Bengali coach Biswajit Bhattacharya-a chhawr theih tur hian foreigner ṭha pali an awm dawn a, player ṭha pali hi mimal taka en châkawm tak vek a ni.

India ramah Nigerian striker Ranti Martins aia record nei ṭha an awm lo a, Aizawl FC coach Jahar Das-a'n East Bengal striker hi thiamna lamah Odafa Okalie aiin dah hniam mah se a naupan zawk avangin tun dinhmunah chuan a ṭhat zawk thu a sawi a, Armed Veng defender Chullova'n Bengali thusawi hi a ṭawmpui bawk.

Ranti Martins hian Goan club Dempo SC chu National Football League-ah vawi hnih a champion hnuah I League-ah vawi thum a champion pui a, AIFF I League Foreigner of the Year vawi hnih a ni tawh bawk. Nigerian striker hian tun season-ah goal riat a khung tawh a, I League-ah goal 146 a khung tawh.

Nigerian defender Bello Rasaq hian nikum khan Mariners champion theih nan Bengaluru lamah goal pawimawh a khung. Red and Gold goalkeeper Rehenesh TP, defender Arnab Mondal leh Narayan Das, midfielder Bikash Jairu, Cavin Lobo, Harmanjot Khabra leh Mohammed Rafique te chu India team-ah koh an ni a, hei hian East Bengal ṭhat zia a nemnghet.