Vawiin aṭangin MFA Cup

2015 MFA Cup chu vawiin hian Khawtetlang Field, Serchhip-ah khelh ṭan a ni dawn. MFA hnuaia inelna ngaihhlut MFA Cup hi district pariat hnuaia club-te inelna niin tun ṭum inelna hi Serchhip DFA-in a thleng.

Vawiin chhun dar 12:30 hian Champhai DFA aiawh Zotlang FC leh Mamit DFA aiawh Venghlun FC ten opening match an khel ang a, tlai dar 2:30-ah Lunglei DFA aiawh Zotlang FC leh Serchhip DFA aiawh New Serchhip FC ten an khel ve leh ang.

District hnuaia club pariatte hi group pahnihah ṭhendarh an ni a, vawiin hi Group A inlan hun niin naktuk hian Group B te an inkhel thung ang. Group B-ah hian season thara MPL khel tur Chhinga Veng FC (Aizawl DFA), Young Learners FC (Lawngtlai DFA), Siaha FC (Siaha DFA) leh Project Veng FC (Kolasib DFA) te an awm.

MFA Cup hnuhnung ber hi November 2014 khan Chhangphut Field, Champhai-ah neih a ni a, Champhai FC chuan Aizawl DFA aiawh Aizawl FC Junior chu 3-1 a hnehin an champion. Kum 2014 hmalam kha chuan MFA Cup-ah hian Mizoram Premier League club an khel thei ṭhin a, MPL khelh theih hunlaia champion hnuhnung ber chu Chanmari FC an ni.