Lianzuala'n Mumbai a chakpui

Ningani zan khan Indian Super League inkhelah Lallianzuala Chhangte chu hero of the match atan thlan a ni a, Mumbai City hian an mikhual Punjab FC chu 2-1 in an hneh.

Punjab tan Luka Majcen chuan minute 38-naah goal hmahruai a khung a, I League champion hi season hmasa ISL league winner lakah hnehna chan an inbeisei hman.

Mahse, inkhel bul ṭantir loh Lianzuala chu minute 45-naah luhtir a ni a, Lunglei tlangval luh hnuah Mumbai goal nawr a na sawt - minute 82-naah Greg Stewart chuan si phurh sutna goal a khung a, 1-1 a ni.

A la tawp lo - Punjab an insiamrem hmain Lianzuala kan hmu a, AIFF Player of the Year ni lai hian Jorge Pereyra Díaz tan siamsakin, Argentine striker hian chakna goal ni turin a khung.

Lianzuala hian goal khungna chance pawh a nei a, mahse, goal hmaa a vanneih zan a ni lo. Mumbai tan Lalengmawia Ralte (Apuia) chuan inkhel bul a ṭan bawk a, Punjab lamah Brandon VL Remdika leh Daniel Lalhlimpuia te chu bench aṭanga luhtir an ni bawk.

Mizo forward pahnih hian Punjab tan goal khungna remchang nei mah se an chhawr thei bik lo a, Punjab defender Dimitrios Chatziisaias chuan hun pek belhah red card hmu zuiin, Punjab tan thawh ngaihna a awm tawh lo.