Arsenal an champion a ngai - Paul Merson

Football pundit Paul Merson chuan Arsenal hmasawn dan chu hmuhnawm a tih thu a sawi a, kawng dik an zawh tih a sawi rualin Premier League champion an nih a ngai tih a sawi bawk.

Mikel Arteta naute hian season hmasa kha an hmang ṭha hle a, mahse season tawp lama an talbuai avangin Manchester City an tluk lo - pahnihnaah an lungawi a ngai, kuminah pawh Citizens pawh hi an elpui hautak ber an nih leh a rinawm.

Merson chuan, "Team ṭha leh hmuhnawm tak an ni a, an la naupan hlawm bawk avangin hma pawh an sawn zel. A pawimawh ber erawh champion a ni, nomawi chawi loh chuan team ṭha tak pawh ni se hriatreng an hlawh lo ṭhin.

"Chuvangin tuna Arsenal team hmuhnawm tak hian mite hriatreng an duh a nih chuan an champion a ngai, a chhan chu league champion an nih loh chuan miten an sawi zui rei peih lo a, hei hi pawm harsa tak ni mah se thil nihna chu a ni," tiin a sawi.

Arsenal hian zanin dar 11:00 hian Premier League khel turin Newcastle United an tlawh dawn. Gunners tan St. James' Park-ah fimkhur a ngai hle ang, anmahni ang bawkin Eddie Howe-a naute hi team phur leh hmuhnawm an ni ve bawk.

Magpies hian Manchester United luhchhuahin League Cup quarterfinal an lut a, hetih lai hian Arsenal erawh West Ham laka chak lo hlim an ni thung - an tunlai boruak hip tak chu a inang chiah lo, zaninah erawh chak loh a pawi avangin thapui an chhuah ang.