LPS Profight Zaninah inhnek hmuhnawm panga

Tata SK 612 LPS Pro Fight semifinal thawh hnihna chu zaninah khelh a ni dawn. LPS Arena, Falkland Vengah zan dar 8:00 aṭangin inhnek hmunnawm a awm ṭan ang a, inhnek panga a awm dawn avangin mit a tlai leh khawp ang.

Middleweight huanga tel turte hi Mizoram Fight Night sulhnu nei tawh niin, Daniel Beipasasa hian semifinal lutin F. Lalthanliana Junior hi light heavy huangah a champion thung, tun ṭum hi Pro Fight an khelh vawi khatna niin, champion tura ṭha tawk an ni.

C. Remruatsanga leh Vanlalruatpuia ten welterweight final luh an inchuh dawn. Ruatsanga hian tawnhriat nei lo chungin semifinal a thleng thei, a theihna a nep lo. A khingpui tur Ruatpuia erawh National School Games champion hlui a ni a, fiahna hautak a hmachhawn dawn.

Bantamweight huanga semifinal khel tur Ramdinthara leh Omega Lalramdina te hi Pro Fight huanga tawnhriat nei an ni a, inelna an hmachhawn chhoh dan thlirin theihna an nei sang, inhnek hmuhnawm an chhawpchhuah ngei a rinawm.

North East Championship 2020 neih ṭuma silver medal latu Lalmuankima hmaah Vanlalenkawltira a ding dawn. Flyweight final lut tur chuan Champhai Dinthar boxer Enkawla hian a thahrui ngahna chu eng ang taka sang nge a ni tih a taka a lantir a ṭul ang.

Lightweight semifinal-ah Lalmuanpuia leh HC Lalramfela te an inhmachhawn dawn. Muanpuia hian nikum khan featherweight-ah semifinal lut mah se a chak lo, kuminah bung thar kai a tum ang. Remfela hi 2015 bantamweight champion a ni thung, awlsam taka paltlang theih a ni dawn lo.