Silly Point: DEJA VU

17 Mimkut Thla, 2023. Premadasa Stadium, Colombo. Asia Cup Final a ni: Sri Lanka batsmen-te chu thlipui Cyclone a sakhmingah phuah Md Siraj-a'n a nuai a, over 16 lekah run 50 chauh siamin an thi fai vek.

Ni 42 liam hnuah...

2, Sahmulphah Thla, 2023. Wankhede Stadium, Mumbai. ICC World Cup Group Stage a ni: Chu Sri Lanka team bawk chuan India-in target run 357 an hnutchhiah chu umin, tun tumah chuan Cyclone 3 intelkhawm, an sakhming an phuah Mohamed a te 2 - Siraj leh Shami leh Jasprit Bumrah ten a nuai leh a. Over 20-na a run 55 chiah puitlin thei in an thi fai leh vek.

Sakbaknei Vanglai Pel

Sakeibaknei hi a vanglai chuan ropui viau mah se, kum a lo vei a, a vanglai a pelh chuan, a patuai zawk ten a lallukhum leh lalram an chhuahsak ṭhin a. Lankan Lions te hi, ningani zana India laka dawl zawra an han zawr takah chuan, England leh Bangladesh hnung zui in, an hawnna tur ticket an lo book lawk pawh a sual tawh awm lo e.

Silly Point hmasa lama Asia Cup final an mualpho tuma kan thailan hrep tawh bawk kha thunawn anga hman a ngai leh si ṭhin a nih hi maw. Indian Pacer ten run 350 chuang cushion dup nuam an nei tih hre rengin, international level-ah chuan a full lam, a half volley lek lek tih tur khawpin ball an vawm ngam a, mahse chu chuan Sri Lanka batsmen te footwork nei lo, crease-ah alkatra tui a luang ta emaw tih tur khawpa an ke pen chhuah harsat rah an seng a, ball var hi vawm full ngam chuan a thar lai hian a lo che ve duh phian nen, out dan chi hrang hrang demonstration kan hmu ta emaw tih mai tur a ni ber.

Cricket-ah chuan lu leh kechheh hi a pawimawh ber tih a ni ṭhin a. Ningani zan khan Sri Lankan batsmen-te lu chuan chhim lam a hawi a, an kechheh in hmar lam a pan lawi si a ni kha maw. Indian team in ball an vuak laia batting pitch em em chu, thawk leh khatah Sri Lanka an han bat ve khan, pace bowling pitch-ah a inthlak ta thut emaw tih mai tur khawpin Indian Pacer ten an vawm tha a, Sri Lankan batsmen te erawh an khel nawi hle thung a ni.

Welcome Home Proteas

ICC-in Apartheid buai avangin 1970 kum khan South Africa Cricket a hrem a nih kha. Kum 21 hnuah chu hremna chu hlipin, International Cricket khel leh thei turin 1991 khan lam ang an lo let a. Hemi tuma an Comeback inkhel hmasa ber lo dawngsawng tu chu India ni in, Sahmulphah Thla ni 10, 1991 khan Clive Rice a kaihruai S Africa team chuan Md Azharuddin leh a hote chu he Eden Gardens, Calcutta a ngei hian an hmachhawn a nih kha. Kum 32 hnuah he an bul tan lehna khelmual ngei Eden Gardens, Kolkata ah bawk India nen hian tun Pathianni hian an intum leh dawn a ni. Chumi ti ngaihnawm leh zual tur chuan tun tournament a team khel tha ber 2 an lo ni kher kher leh, mi tamzawk ten Final a intum tura an rin lawk deuh pawh an ni.

Super Sunday

Vawin lama inkhel tur Australia leh New Zealand ten an tumpui turte Pakistan leh England laka an result a zirin, Proteas pawh hi India an tum hma ngawt hian semi final lut chiang tawh an ni thei a. Chutirualchuan, tun kar 4 chhunga round sarih hnehsawh taka inkhel tawh, India ram chhim leh hmar mel tamtak thlawkkual a, muthmun tuahna mumal pawh nei mang lo Rohit Sharma leh a hote hi an chau ang tih hlauhawm ta ber.

South Africa nen naktuka an intum hunah pawh, vice captain Hardik Pandya a fit phawt chuan match fitness neih lehna hun remchang a ni a. Tin, combination kaltluang lai tichhe em em si lova, tun World Cup a la inlan tamlo R Ashwin, Ishan Kishan leh Shardul Thakur ten player ṭhenkhat an lo thlak ta nih pawn thil mak a ni lo ang.

Eden Huanah let leh ang aw

Infiamna ngaina leh la ulh ve ṭhin tak Bengali ho hian, Eden Gardens-ah hian World Cup hnuhma an lo nei ve nual a. 1996 World Cup a, Sri Lanka laka an chak tawh dawn lo tih a lan tak hnu a, mipui thinrim in saidaium leh meithal siamchawp khelmual lama an vawm luh chiam atang te khan ṭhangkhat lian zet a lo liam ve ta a. He Eden huan hi batting tana hmun nuam bawk a ni ṭhin.

Amaherawhchu, India khawchak lam thlasik inher tawhna hmun a nih dawn avangin, thimhlim dai a tla tura rin a ni a, hei hian thumvawrin nasa takin kawng ro a su dawn tih hriatsa a ni.

Eden lamah tun Pathianni chu kan mit kan len vek mai aniang chu. Tin, he khelmual ngei hi he thu ziaktu ngei tan pawn hmun pawimawh a ni a. Nimin mai emaw ka tih laiin, thla 20 lai lo liamta khan, he khelmualah hian ka professional cricket zinkawng ka zawh hnuhnun berna tur ka khelhna leh ka boot ka khaina hmun, ka tumpui player leh ka teammate-te zawng zawngin ka thih ni thlenga ka theingilh tawhloh tur Guard of Honour a min thlahna hmun ngei kha a ni. Engkim mai hi a Deja Vu a ni e.