Dortmund vs Bayern - ṭum dang zawng aiin a 'hot'!

Tun kartawp European football-a inkhel tur zingah Borussia Dortmund leh Bayern Munich inkhel turin ngaihven a hlawh hle - zanin dar 11:00-ah an intawng dawn a, German football-a club lian pahnih inkhel tur hi ṭum dang aiin a boruak a sang bawk.

A chhan maw? Bundesliga match kua khelh tawhah team pahnih hi point hnih chiahin an inthlau mek a, hmahruaitu Bayer Leverkusen an awm bawk - a tawi zawnga sawi chuan club pahnih hian elpui thar an nei tihna a ni a, zaninah tlawm a thiang lo ve ve.

Xabi Alonso enkawl Leverkusen hi zanin dar 8:00-ah an inlan ve dawn bawk a, khualmualah Hoffenheim an lenchilh dawn. Bayer result hre saa inlan tur Bayern leh Dortmund tan pressure a sang zual sawt ang.

Bayern an chuai?

Harry Kane-a'n nomawi chawi châka a zawm Bayern hian tun season-ah nomawi an chawi theih pali aṭangin pahnih an thlauh der tawh - DFL-Supercup-ah RB Leipzig chu 3-0 in an ngam lo a, DFB-Pokal aṭangin third division club FC Saarbrücken chuan rin loh takin an pet chhuak bawk!

German club hian champion nomawi chawi theihna pahnih chiah an nei ta a, chu chu Bundesliga leh Champions League a ni - a harsa dawn tih a chiang a, season 11 zet a zawna an champion tawhna Bundesliga lah Bayer an awm belh tak avangin ṭum dang zawng aiin a harsa dawn.

Chumiin a hrilhfiah chu champion tum Bayern tan an elpui team hneh zel a ṭul tihna a ni a, Saarbrucken laka an result avangin hnual reng a hun tawh lo - Jamal Musiala, Leroy Sane, Kingsley Coman leh Kane neitu team tan goal khung a harsa lo tura ngaih a ni.

Dortmund beiseina

Borussia Dortmund-in tun season-a league match kua an khelhah tlawm an la nei lo a, mahse, vawi thum draw an neih avangin table-ah palina an ni mek - an league match hnuhnung berah Eintracht Frankfurt chu 3-3 in inhnehtawkpui mah se, German Cup lamah Hoffenheim an hneh zui avangin inrintawkna an nei.

Chutihrual chuan Dortmund hian champion tur meuh chuan goal an khung tam tawk lo a, tlarhnung a phui lo bawk. Leverkusen (27 goals) leh Bayern (34) ten league-a goal an khung tawh nual laiin goal 20 chiah an la khung ve a, goal 11 an chhuah bawk.

Dortmund tan tlarhmaah Donyell Malen, Marco Reus, Julian Brandt leh Niclas Füllkrug ten goal khung lamah ṭan an lak thar a ṭul tihna a ni a, tlarhnungah Mats Hummels leh Nico Schlotterbeck te hoin an hna an thawh ṭhat a ṭul bawk ang.