Diaz-a'n training a zawm

Colombia rama hel pawl pakhat National Liberation Army (ELN)-in a pa an rukbosak avanga Liverpool tana match hnih ngawt inlan tawh lo Luis Diaz chuan Liverpool training a zawm ve leh ta a, Pathianni zan dar 10:00-a Luton Town an hmachhawn hunah inlan thei tura beisei a ni.

Kar hmasa Pathianni zana Nottingham Forest an hmachhawn hma chiahin Diaz hi a nu leh pa rukbo an ni tih hrilh a ni a, squad aṭanga inhnukdawk zuiin, kar laihawla League Cup match an khelhah pawh a inlan lo - a nu hi hmuh tawh niin, a pa erawh an la hmu lo thung.

Liverpool chuan an forward hi a inpeih chian hma chu a duh chen chen chawl turin zalenna pe mah se Diaz hian inkhelh a duh tawh niin a lang a, a pa rukbo boruak lam pawhin zia lam a pan ṭan.

ELN hian Diaz-a pa hi an chhuah zalen thuai tur thu an sawi a, Colombian chanchinbu lar El Tiempo chuan Colombian Police-te pawh Diaz-a pa chhuah zalen dawngsawng tur hian an inring tawh hle niin an ziak.