Rodrygo tan contract thar

Real Madrid-a lungawi lo anga an sawi forward Rodrygo chuan khawdang a hawi lo tih pholangin, Real tan rinawmna thu a tiam nawn a, Santiago Bernabeu-ah kum 2028 thleng khel turin contract thar a ziak.

Kum 22 mi Rodrygo hian Brazilian club ṭha Santos aṭangin Real hi June 2019 khan a zawm a, Spanish club lian tan match 179-ah goal 39 khungin assist vawi 33 a neihsak tawh a, tun season-ah match 14 khel tawhin goal hnih leh assist vawi khat a nei tawh bawk.

Real tan hian La Liga nomawi vawi hnih chawi tawhin, Copa del Rey, Champions League, European Super Cup leh Club World Cup nomawi pakhat ṭheuh a chawi tawh a, Spanish Super Cup-ah vawi hnih a champion pui tawh bawk a ni.

Rodrygo hi Brazil tan vawi 18 inlan tawhin goal li a khung a, World Cup 2022-ah pawh khan match ngaah a inlan. Ram tana a khelhpui Vinicius Jr chuan tun hnai khan kum 2027 thleng khel turin Real-a a contract hi a pawtsei ve bawk.

Real Madrid hian tun season La Liga match 11 khelh tawhah point 28 hmuin hma an hruai mek a, Pathianni zan dar 1:30 hian league match khel turin Rayo Vallecano an mikhual dawn bawk a ni.

Nizan dar 1:30 khan Atletico Madrid chuan Las Palmas lenchilhin, an result kan hre hman lo a, Barcelona chuan zanin dar 1:30 hian Real Sociedad an lenchilh dawn thung.